گرنگترین مانشێتەکان

بودجەو چارەنوسی رێککەوتنی هەرێم و بەغدا!

بودجەو چارەنوسی رێککەوتنی هەرێم و بەغدا!

دڵشاد ئه‌نوه‌ر

هەرێم پەلەیەتی بۆ رێککەوتن لەسەر بودجە لەگەڵ بەغدا، حکومەتەکەی عادل عەبدولمەهدیش کە لە لێواری ڕووخاندایە، ناچارە نەرمی بەرامبەر هەرێم بنوێنێت، بەڵام لەگەڵ ئەوەشدا وەکو ئەوەی کە میدیای هەرێم بڵاویکردۆتەوە گوایە رێککەوتن لەسەر بودجە کراوە و هەموو شت تەواو بووە، وانیە و زۆر شت ماوە.
هەرێم و بەدیاریکراوی پارتی دەیەوێت زوو لەگەڵ بەغدا رێکبکەوێ، بۆ ئەوەی گەر حکومەتەکەی عادل عەبدولمەهدی ڕووخا، ئەم رێککەوتنە بکرێتە بنەمای گفتووگۆ لەگەڵ حکومەتی دوای عەبدولمەهدی.
حکومەتەکەی عادل عەبدولمەهدیش ناچارە لەگەڵ هەرێمدا رێکبکەوێ، چونکە دۆخی خراپە و نایەوێ لەگەڵ هەرێمیشدا کێشە دروست بکات، یاخود بە مانایەکی تر، ئێستا عێراق هەموو دژیەتی و تەنها حیزبەکانی هەرێم کێشەیان لەگەڵی نیە.
بەڵام پەیوەندیدار بە بودجەی هەرێم، ئێمە دەبێت دوورتر لە مەسەلەکە بڕوانین، پرسیارەکە ئەوەیە ئایا گەر حکومەتەکەی عەبدولمەهدی لەم دۆخە شلۆقە دەربازی بوو، پابەند دەبێت بەو رێککەوتنەکەی کە لەکاتی وەزع خراپیدا لەگەڵ هەرێم
لەکاتێکدا وەکو لەسەرەوە ئاماژەم پێکرد، هێشتا نێوان هەرێم و بەغدا، بەم دۆخەشەوە زۆر شت ماوە لەسەری رێکبکەون.
یاخود گەر ئەم قەیرانەی عێراقی گرتۆتەوە، بووە هۆی رووخانی حکومەتەکەی عەبدولمەهدی، گەرەنتی چیە؟ حکومەتی داهاتوو پابەند بێت بە رێککەوتنێک کە عەبدولمەهدی لەکاتی لاوازیدا کردوویەتی .
ئێستا هەموو فشارەکان بۆ ڕووخانی عەبدولمەهدین، ژمارەی کوژراو تا دێت بەرز دەبێتەوە، حیزبەکان بەدەست شەقامەوە وەزعیان خراپە، کاریگەری ئێران لاواز بووە، خەڵک زیاتر توڕەیە و تەنانەت ئەمشەو هەوڵی پەلاماردانی مەرجەعیەتیشیان دا.
هەوڵدان بۆ پەلاماردانی مەرجەعیەت تووڕەیی نیە لە مەرجەعیەت، بەڵکو فشارە تا سبەینێ کە هەینی یە، فەتوای یەکلاکەرەوە بدات بۆ ڕووخانی حکومەت و پشتگرتنی جەماوەر.
بۆیە مەترسیەکان لەسەر رێککەوتنە تەواو نەکراوەکەی هەرێم و بەغدا لێرەوەن، گەر توڕەیی خەڵک سەریکێشا بۆ ڕاپەرین، ئەوا خودی ئەو حیزبانەش دەکەونە نێو قەیران و خۆیان پێ ناپارێزرێ کە بەناوی بەغداوە لەگەڵ هەرێمدا رێککەوتون!
ئەگەریش توڕەبوونی خەڵک، ڕووخانی حکومەتەکەی عەبدولمەهدی و هێنانی حکومەتی تازەی بەدوادا هات، ئەوا حکومەتی داهاتوو لە ژێر کاریگەری ئێران و حیزبی شیعی دا نابێت، بەڵکو حکومەتێکی چاوترسێنکراو و گوێ لە مشتی جەماوەر دەبێت، مەحاڵە بچێتە ژێر باری رێککەوتنێک کە عەبدولمەهدی لەکاتی لاوازیدا کردوویەتی.
بۆیە هاوکێشەکانن ئاڵۆزن، رێک چارەنوسی بودجە و رێککەوتنی نێوان هەولێر و بەغدا، بەستراوەتەوە بە چارەنوسی ئەو ڕاپەرینەی لە عێراق سەریهەڵداوە، واتە ئەوەی لە عێراق هەیە، نەخشەی داهاتووی پەیوەندیەکانی نێوان هەولێر و بەغدا دادەرێژێتەوە.