دوای گفتوگۆکانی نیوان بەغدا و ئەنقەرە لەبارەی پڕۆژەی "ڕێگای گەشەپێدان"، وەزارەتی دەرەوەی ئەمریکا ڕایگەیاند، پاڵپشتی لەو ھەوڵانە دەکەن کە بە ئامانجی ھەمەجۆرکردنی ئابووریی عێراق، خراونەتەگەڕ.
ماتیۆ میلەر وتەبێژی وەزارەتی دەرەوەی ئەمریکا ڕایگه‌یاند: "لە کۆبوونەوەی لیژنەی باڵای ھەماھەنگی نێوان ئەمریکا و عێراق، بەغدا پلانەکانی خۆی بۆ پڕۆژەی ڕێگای گەشەپێدان لەگەڵ ئەمریکا باس کردووە".
وتیشی: "ئێمە پاڵپشتی لەو ھەوڵانە دەکەین کە بە ئامانجی ھەمەجۆرکردنی ئابووریی عێراق، خراونەتەگەڕ".
ڕۆژی ٢٢ی ئەم مانگە سەرکۆماری تورکیا، ڕەجەب تەیب ئەردۆغان سەردانی بەغدای کرد و لە میانیدا بەجیا لەگەڵ سەرکۆماری عێراق، عەبدولـلەتیف ڕەشید و سەرۆکوەزیرانی عێراق، محەمەد شیاع سوودانی کۆبووەوە.
ھەر لەمیانی سەردانەکەی سەرکۆمار بۆ بەغدا، ٢٦ ڕێککەوتنی ھاریکاری و یاداشتنامەی لێکتێگەیشتن لە نێوان تورکیا و عێراق لە بوارە جیاوازەکانی وەک بازرگانیی، گەشتوگوزار، پەروەردە، تەندروستیی، ئاسایش، زانست و تەکنەلۆجیا، وەبەرھێنان، وەرزش و لاوان لە نێوان ھەردوو وڵاتدا واژووکران.
ھەر ڕۆژی ٢٢ی ئەم مانگە بەسەرپەرشتی سەرۆکوەزیرانی عێراق، محەمەد شیاع سوودانی و سەرکۆماری تورکیا، ڕەجەب تەیب ئەردۆغان، یاداشتنامەیەکی چوار لایەنە لەنێوان عێراق، تورکیا، قەتەر و ئیمارات، ئەوەش بە ئامانجی ھەماھەنگی ھاوبەش لەبارەی جێبەجێکردنی پڕۆژەی "ڕێگای گەشەپێدان".
پڕۆژە "ڕێگای گەشەپێدان"، ڕێگاکانی وشکانی و ئاسنین لە خۆدەگرێت کە بەندەری فاو لە کەنداوی بەسرە باشووری عێراق بە درێژایی ھەزار و ٢٠٠ کیلۆمەتر بە تورکیا و دواتر ئەورووپا دەبەستێتەوە.
