دیجیتال میدیا سپیدە:
نان و مان سەرپشکن، نە درووشمێن بێناڤەرۆك
نان و مان سەرپشکن، نە درووشمێن برسقۆک و ڤالا یێ نان نەبت، قەد یێ ئازاد نینە و هەڕۆ دێ بتە کۆلە و چووڤێ دەستێ غەیری خوە.
ژ ئێکا گرنگییێڤە، ئێمناهی پشتی پەیداکرنا نانی دئێت و دەرئەنجاما نانپەیدابوونێیە، ژ بەر هندێ ژی قورئانا پیرۆز د سۆرەتا (قوریش)دە دبێژت: ((…. الذي أطعمهم من جوع وآمنهم من خوف ـ یێ ئەو تێر کرین پشتی برسێ و ئێمن کرین ژ ترسێ)) ئانكو (نان) ب بەر (ئێمناهی) یێ ئێخستییە.
گۆتنەکا دی ژی هەیە دبێژت: ((… ئەوێ نانێ ڕۆژا خوە نەبت، خودانێ بڕیارا خوە نابت)). ئەز ژ بەرێ خوەڤە ل وێ باوەرێ مە کو ئەڤێن درووشمێ ڕووتێ (ملەت و وەلات بەری نانی) هلددن، هەمی تێر و تەسەلن و وان های ژ قوڕقوڕا زکێ فەقیر و ژاران نینە و د ئاگرێ برسێدە ناسوژن.
نە ب تنێ د ژین و ژیارا مرۆڤی ب تنێدە، بەلکو د یا هەر خودانڕوحەکێدە، نان سەردەست و سەرپشکەکی بێ هەڤڕکە. یێ باوەر نەکت ژی بلا سێ ڕۆژان ل سەر ئێک خوە بهێلتە برسی و ژ نوو هزرا خوە باش تێدە بکت.
من ب خوە ئێکجار باوەری ب وان گۆتنک و درووشمێن برسقۆک و ڕووتەک نینە یێن کو سیاسی پێ ل بەر دگەڕن کەربا برسێ و نەڕازیبوونێ پرت و بەلاڤ و تەرابەرا بکن و خەلکەکێ ب هندێ بخاپینن کو ملەت و وەلات د سەر هەوجەیی و خزمەتگوزارییێن ڕۆژانەڕەیە. ب زکەکی تێر و تەژی، خەلکی ب هندێ قایل بکن کو دڤێت مرۆڤ کەرامەتێ بدتە پێشییا ڕووساتی و برساتی و ڕووتەکییێ.
کاکۆ، براکۆ، گاڤا ئەز ڕووس و برسی بووم، کەرامەت ژی من نامینت .. ((کەرامەت کوجا مەرحەبا))!!! کا بلا خودانێن درووشمان پارییێ نانی ژ دەڤێ خەلکی نەدزن و مانێ د کیسێ واندە بهێلن و قیر و جەهنەم ل وان درووشمان یێن کو دبنە ژێدەرێ گەفکرنێ د ژیانا خەلکیدە و ژیارێ لێ دکنە ژەهر و پێمرن .. زێدەتر ژی بۆ گوهدرێژان دئێتە گۆتن.