سەندیكای پزیشكانی عێراق هۆشداری دەربارەی سەنتەرەكانی جوانكاری و تاتۆ دەدات و ئاشكرای دەكات كە ئەم سەنتەرانە هۆیەكی سەرەكی بڵاوبوونەوەی ئایدزن.
لە لێدوانێكی ڕۆژنامەوانیدا، سەباح شبر، سەرۆكی سەندیكای پزیشكانی عێراق ڕایگەیاند: ئەو سەنتەرانەی تایبەتن بە جوانكاریی و مۆڵەتی وەزارەتی تەندروسیتیان نیە، زیاتر دەبنە هۆی گواستنەوە و تووشبوون بە نەخۆشی ئایدز.
سەرۆكی سەندیكای پزیشكانی عێراق دەشڵێت: "جگە لە سەنتەرەكانی جوانكاری، سەنتەرەكانی تایبەت بە تاتۆش ئەگەری گواستنەوەی نەخۆشی ئایدزیان هەیە."
وتەكانی سەرۆكی سەندیكای پزیشكانی عێراق لەكاتێكدایە كە لەماوەی چەند ساڵی رابردوو دوو هەزار و 638 حاڵەتی تووشبوون بە ئایدز لە عێراق تۆمار كراوە.
سەرەڕای ئەم مەترسیانەش كەچی سەنتەرەكانی جوانكاری و تاتۆ لە عێراق و هەرێمی كوردستانیش لە زیادبووندان ، تەنیا ساڵی 2022، لە پارێزگای بەغدا زیاتر لە 400 سەنتەری جوانكاری هەبوون، زۆربەی زۆریان هیچ مۆڵەتێكی تەندروستیان نەبووە.
