دیجیتال میدیا سپێدە:
ده‌قێ ڕاگه‌هاندنا ژوورا بازرگانى و پیشه‌سازییا دهۆكێ:
پشتى هێرشا بێ به‌هانه و سته‌مكارانه یا كۆمارا ئیسلامىیا ئیرانێ لسه‌ر هه‌ولێرا پایته‌ختێ كوردستانێ ل 15ى ڤێ هه‌یڤێ، كو تێدا وه‌ڵاتیێن سڤیل بووینه ئارمانج و ب مخابنى ڤه ئێك ژ سه‌رمایه‌دارێن بناڤوده‌نگێن كوردستانێ (پێشره‌و مه‌جید دزه‌یی) دگه‌ل كچه‌كا خۆ شه‌هیدبوون و سێ ئه‌ندامێن مالباتا وى ژى ب گرانى برینداربوون، هه‌روه‌سا ئێك ژ بازرگانێن دیار یێن عیراقێ ژى د وێ هێرشێ دا شه‌هیدبووینە كو هه‌ر هه‌مى خه‌لكێ بێ گونه‌هـ و سڤیل بووینه و یا دیاره كو ئارمانجا هێرشێ بتنێ تێكدانا ئاساییش و سه‌قامگیریا كوردستانێ و ڕێگرتنه ل پێشڤه‌چوونێن وێ یێن ئابوورى و بازرگانى و پیشه‌سازى.
ئه‌م ل ژوورا بازرگانى و پیشه‌یازییا دهۆكێ دووباره ڤان هێرشێن سته‌مكارانه ل دژى خه‌لكێ سڤیلێ كوردستانێ ب دژوارى ئیدانه و شه‌رمزار دكه‌ین و هه‌ڤخه‌مییا خۆ د گه‌هینینه مالباتێن قوربانییان و ژوورا بازرگانى و پیشه‌سازییا هه‌ولێرێ كو ئێك ژ ئه‌ندامێن وێ یێن كارا تێدا شه‌هیدبوو.
ژبه‌ركو ژماره‌كا مه‌زن یا به‌رهه‌مێن ئیرانى د بازارێن مه دا هه‌نه، ئه‌م ل ژوورا بازرگانى و پیشه‌سازییا دهۆكێ ب هویرى ڤه‌كولینێ لسه‌ر دیتنا بازارێن پێگوهور بۆ بازرگانێن خۆ دكه‌ین بۆ وێ یه‌كێ ل جهێ به‌رهه‌مێن ئیرانى، ب به‌رهه‌مێن خۆمالى و یێن وه‌لاتێن دى یێن ده‌ڤه‌رێ و جیهانێ پێدڤییا خه‌لكێ پارێزگه‌ها دهۆكێ و كوردستانێ پڕبكه‌ن.
ژ پلان و كارێن مه یێن ده‌ستپێكییه كو به‌رهه‌مێن ناڤخۆیی لدویڤ ستانداردان بینینه ئاستێ به‌رهه‌مێن وه‌لاتێن جیهانێ بۆ وێ یه‌كێ د سالێن نێزیكدا ئه‌م بشێین پشتبه‌ستنێ لسه‌ر به‌رهه‌م و شیانێن ناڤخۆیی بكه‌ین و بكه‌ینه پێگوهور بۆ به‌رهه‌مێن بیانى.
