گرنگترین مانشێتەکان
نیشان دان به‌پێی به‌روار : ئەیلول 2019

دیجیتاڵ میدیاى سپێده‌

 

راپۆرته‌ رۆژنامه‌وانیه‌كان له‌ به‌ریتانیا ئاشكرای ده‌كه‌ن ، یانه‌ی مانچسته‌رسیتی ده‌ستی به‌ هه‌وڵه‌كانی كردووه‌ بۆ دیاری كردنی شوێنگره‌وه‌ی پیپ گواردیۆلای له‌ مه‌شقدانه‌وه‌ی تیپه‌كه‌ی ، كه‌ له‌ كۆتایی وه‌رزی داهاتوو گرێبه‌سته‌كه‌ی كۆتایی پێدێت.
به‌گوێره‌ی رۆژنامه‌ی میره‌ری به‌ریتانی ، مانچسته‌ر سیتی (جیوڤانی ڤان برۆنكهۆرستی) ڕاهێنه‌ری پێشووی فینۆردی هۆڵه‌ندی ده‌ست نیشان كردووه‌ شوێنی گواردیۆلا بگرێته‌وه‌.
ڤان برۆنكهۆرست له‌ مانچسته‌ر ئاماده‌یه‌ و چاودێری كاره‌كانی یانه‌كه‌ و تیپه‌كه‌ ده‌كات ، له‌گه‌ڵ ئه‌كادیمیای یانه‌كه‌ش به‌رده‌وامه‌ پاش ئه‌وه‌ی له‌لایه‌ن خاوه‌نی یانه‌ رازی كرا له‌گه‌ڵ تیپه‌كه‌یان به‌رده‌وام بێت.
به‌گوێره‌ی رۆژنامه‌ به‌ریتانیه‌كه‌ به‌رپرسانی یانه‌كه‌ ده‌یانه‌وێت درێژه‌ به‌ شێوازی (یارى گشتگیر ) بده‌ن له‌ تیپه‌كه‌یان ، كه‌ له‌وه‌ته‌ی گواردیۆلا هاتووه‌ په‌یڕه‌وی ده‌كه‌ن.
بڕواشیان وایه‌ ڤان برۆنكهۆرست پێشتر له‌ به‌رشلۆنه‌ یاری كردووه‌ باشترین كه‌سه‌ بۆ درێژه‌دان به‌م شێوازه‌ له‌ تیپه‌كه‌یان .

 

ئاماده‌كردنى : سامان خۆشناو


دیجیتاڵ میدیاى سپێده‌

 

یانه‌ی فیۆڕه‌نتینا به‌ سێ خاڵی گرنگ له‌ یاریگای (سان سیرۆ ) گه‌ڕایه‌وه‌ ، كاتێك له‌ یارییه‌كانی جه‌وله‌ی شه‌شه‌می خولی ئیتاڵیا به‌ سێ گۆڵ به‌رامبه‌ر به‌ گۆڵێك له‌ یانه‌ی میلانی برده‌وه‌.
ئیریك بۆلیگار له‌خوله‌كی 14 گۆڵی یه‌كه‌می به‌لێدانی سزا بۆ فیۆڕه‌نتینا تۆمار كرد ، گێمی یه‌كه‌میش به‌م گۆڵه‌ كۆتایی هات.
گایتانۆ كاسترۆفیلی له‌خوله‌كی (66) گۆڵی دووه‌می بۆ فیۆره‌نتینا زیاد كرد ، دوای چوار خوله‌كی تر (فیدریكۆ كییزا) لێدانێكی سزای بۆ فیۆڕه‌نتینا به‌ فیڕۆدا ، له‌خوله‌كی 78 فرانك ریبیری گۆڵی سێیه‌می یانه‌كه‌ی تۆمار كرد ، كه‌ دووه‌مین گۆڵی بوو له‌م وه‌رزه‌ی خوله‌كه‌دا تۆماری ده‌كات .
تاكه‌ گۆڵه‌كه‌ی میلانیش له‌خوله‌كی 80 له‌لایه‌ن رفائیل لیاو تۆمار كرا، به‌م بردنه‌وه‌یه‌ش فیۆڕه‌نتینا به‌ كۆكردنه‌وه‌ی هه‌شت خاڵ پله‌ی نۆیه‌می گرتوه‌، میلانیش به‌ شه‌ش خاڵ پله‌ی 16می گرتوه‌ ئه‌مه‌ چواره‌مین دۆڕان بوو له‌م وه‌رزه‌دا توشی ده‌بێت .

 

ئاماده‌كردنى : سامان خۆشناو


دیجیتاڵ میدیاى سپێده‌

 

كاتژمێر (09:45) خوله‌كى ئه‌مشه‌و ، له‌ جه‌وله‌ی شه‌شه‌می خولی یانه‌كانی ئیتاڵیا له‌سه‌ر یاریگای سان سیرۆ ، یانه‌ی میلان له‌ یارییه‌كی گرنگی به‌هێز میوانداری یانه‌ی فیۆره‌نتینا ده‌كات.
میلان به‌ كۆكردنه‌وه‌ی شه‌ش خاڵ پله‌ی 13می ریزبه‌ندی گرتوه‌، ئه‌م یانه‌یه‌ ئه‌نجامه‌كانی ئه‌م وه‌رزه‌ی له‌چاو وه‌رزی رابردوو باشتر نین و ، تا ئێستا له‌ پێنج جه‌وله‌ی رابردوو سێ دۆڕانی هه‌یه‌و له‌ دوو یاری رابردووش له‌سه‌ریه‌كتری توشی دۆران بووه‌، دواین دۆڕانی به‌رامبه‌ر به‌ یانه‌ی تۆرینۆ بووه‌.
ماركۆ جیامپاولۆی ڕاهێنه‌ری یانه‌ی میلان دوای دۆڕانی تیپه‌كه‌یان به‌رامبه‌ر به‌ تۆرینۆ رایگه‌یاندبوو :" پێویسته‌ له‌یاری به‌رامبه‌ر فیۆره‌نتینا به‌شێوه‌یه‌كی باشتر ئاماده‌كاری بكه‌ین و ، خۆمان له‌م دۆخه‌ی ئێستا رزگار بكه‌ین و یانه‌كه‌مان به‌ره‌و سه‌ركه‌وتن ببه‌ین".
له‌م یارییه‌دا خۆسیه‌ مانوێل رینای گۆڵچی ئیسپانی ناتوانێت له‌گه‌ڵ میلان ئاماده‌بێت ، پاش ئه‌وه‌ی له‌یاری رابردوو به‌كارتی سور له‌لایه‌ن ناوبژیوان كرایه‌ ده‌ره‌وه‌ی یاریگا.
میلان له‌ هێرشبردن و به‌رگری لاوازه‌، له‌ هێرشبردن سه‌ره‌رای ئه‌وه‌ی خاوه‌ن هێرشبه‌رێكی به‌توانای وه‌ك بیونتیكه‌ ، به‌ڵام تا ئێستا نه‌یتوانیوه‌ ئاستێكی دڵخۆشكه‌ر پێشكه‌ش بكات و تیپه‌كه‌ له‌كۆی ئه‌نجامدانی پێنج یاری ته‌نها سێ گۆڵی تۆمار كردووه‌.
له‌ به‌رگریش ئاستی تیپه‌كه‌ زۆر خراپه‌ و هۆكاری خراپی ئه‌نجامه‌كانی ئه‌م وه‌رزه‌، میلان پێنج گۆڵی لێ تۆمار كراوه‌ ئه‌مه‌ش وای كردووه‌ تیپه‌كه‌ سێ دۆرانی هه‌بێت، له‌سه‌ر تیپه‌كه‌ پێویسته‌ بردنه‌وه‌ له‌م یارییه‌دا تۆمار بكات ئه‌گه‌ر بردنه‌وه‌ به‌ده‌ست نه‌هێنن دوورنیه‌ ڕاهێنه‌ر ببێته‌ قوربانی سه‌ره‌كی و دوور بخرێته‌وه‌.
هه‌رچی یانه‌ی فیۆره‌نتینایه‌ له‌ جه‌وله‌ی رابردوو یه‌كه‌مین بردنه‌وه‌ی له‌م وه‌رزه‌ به‌ده‌ست هێنا، ئه‌م یانه‌یه‌ خاوه‌نی پێنج خاڵه‌و پله‌ی 14می ریزبه‌ندی گرتوه‌، ئه‌م یانه‌یه‌ بردنه‌وه‌كه‌ی به‌رامبه‌ر به‌ سامبدۆریا بووه‌، پێشتریش له‌گه‌ڵ یۆڤنتۆس و ئه‌تله‌نتا به‌رامبه‌ر بووه‌، به‌ ناپۆلی و جه‌نه‌واش دۆراوه‌.
فیۆره‌نتینا خاوه‌ن پێكهاته‌یه‌كی به‌هێزه‌ چه‌ندین یاریزانی ئاست به‌رز له‌ ریزه‌كانیدا یاری ده‌كه‌ن، له‌وانه‌ش فرانك ریبیری فه‌ره‌نسی و فیدریكۆ كییزا و كیڤن برینس بواتینگ و نیكۆلا میلینكۆفیچ، ئه‌م یاریزانانه‌ توانای ئه‌وه‌یان هه‌یه‌ سه‌رئێشه‌ بۆ یانه‌ی میلان دوورست بكه‌ن و توانای ئه‌وه‌یان هه‌یه‌ كێشه‌كانی یانه‌كه‌ قوڵتر بكه‌نه‌وه‌و به‌ئه‌نجامێكی باش بگه‌ڕێنه‌وه‌ .

 

ئاماده‌كردنى : سامان خۆشناو


دیجیتاڵ میدیاى سپێده‌

 

له‌سه‌ر یاریگای سانتیاگۆ به‌رنابیۆ له‌ جه‌وله‌ی شه‌شه‌می خولی یانه‌كانی ئیسپانیا یانه‌ی ریال مه‌درید چاوی له‌ بردنه‌وه‌ی سێیه‌مه‌ كاتێك میوانداری یانه‌ی ئۆساسۆنا ده‌كات.
ڕیال مه‌درید به‌ وره‌یه‌كی به‌رز ئاماده‌كاری بۆ ئه‌م یارییه‌ ته‌واو كردووه‌ پاش ئه‌وه‌ی له‌ جه‌وله‌ی رابردوو له‌ ده‌ره‌وه‌ی یاریگای خۆی به‌ سه‌ركه‌وتنێكی گرنگ و به‌نرخ به‌رامبه‌ر به‌ یانه‌ی ئیشبیلیه‌ گه‌رایه‌وه‌.
تیپه‌كه‌ی زێدان به‌ كۆكردنه‌وه‌ی 11 خاڵ به‌ جیاوازی گۆڵ پله‌ی دووه‌می ریزبه‌ندی یانه‌كانی گرتوه‌، ئه‌م ئه‌نجامه‌ش جێگه‌ی دڵخۆشی تیپه‌كه‌یه‌ چونكه‌ ئه‌و تیپانه‌ی به‌ ركابه‌ری سه‌ره‌كی ریال مه‌درید هه‌ژمار ده‌كرێن خاڵی زیاتریان له‌چاو ئه‌م تیپه‌ له‌ده‌ست داوه‌.
زێدان تیپه‌كه‌ی به‌شێوه‌یه‌كی باش بۆ ئه‌م یارییه‌ ئاماده‌ كردووه‌و ئیسكۆ پاش دووركه‌وتنه‌وه‌ی ماوه‌یه‌كی زۆر له‌ یاریگاكان گه‌رایه‌وه‌ مه‌شق و ڕاهێنانه‌كان و بریاره‌ به‌شداری له‌م یارییه‌دا بكات ، گه‌ڕانه‌وه‌ی ئه‌م یاریزانه‌ش بۆ پێكهاته‌ی تیپه‌كه‌ هێزێكی زیاتر به‌ هێڵی ناوه‌راستی تیپه‌كه‌ ده‌به‌خشێت.
ڕیال مه‌درید به‌هۆی پێكانه‌وه‌ له‌ تواناكانی لۆكا مۆدریچ و مارسیلۆ و ئه‌سینسیۆ بێ به‌ش ده‌بێت، گه‌رانه‌وه‌ مۆدریچ و مارسیلۆ نزیكه‌ بۆ یاریگاكان به‌ڵام له‌م یارییه‌دا به‌شداری ناكه‌ن.
سه‌ره‌رای ئه‌وه‌ی له‌ جه‌وله‌ی رابردوو ریال مه‌درید بردنه‌وه‌ی به‌ده‌ست هێناوه‌ به‌ڵام زێدان مه‌ترسی دورخستنه‌وه‌ی له‌سه‌رماوه‌ ئه‌گه‌ر ئه‌نجامه‌كانی به‌ره‌و باشتر نه‌بات ئه‌گه‌ری زۆره‌ له‌ ئه‌ركه‌كه‌ی دوور بخرێته‌وه‌.
ئه‌وه‌ی تایبه‌ت بێت به‌ یانه‌ی ئۆساسۆنا له‌م وه‌رزه‌ یه‌كێكه‌ له‌و یانانه‌ی تا ئێستا توشی دۆران نه‌هاتوه‌، ئه‌م یانه‌یه‌ خاوه‌نی حه‌فت خاڵه‌و پله‌ی 10می ریزبه‌ندی گرتوه‌، ئه‌م یانه‌یه‌ له‌م وه‌رزه‌ یه‌ك بردنه‌وه‌ی به‌رامبه‌ر لیگانیس له‌ جه‌وله‌ی یه‌كه‌می یارییه‌كان به‌ده‌ست هێناوه‌و چوار یارییه‌ له‌دوای یه‌كتر به‌رامبه‌ر ده‌بێت.
ئۆساسۆنا چاوی له‌وه‌یه‌ به‌ئه‌نجامێكی باش له‌ سانتیاگۆ به‌رنابیۆ بگه‌ڕێته‌وه‌ ، به‌ڵام یاری كردنیش له‌م یاریگایه‌ ئاسان نیه‌.
ئۆساسۆنا له‌ 10 یاری رابردوو نه‌یتوانیوه‌ بردنه‌وه‌ به‌رامبه‌ر به‌ ڕیال مه‌درید به‌ده‌ست بهێنێت، دواین بردنه‌وه‌ی به‌رامبه‌ر به‌ ڕیال مه‌درید ده‌گه‌ڕێته‌وه‌ بۆ كانونی دووه‌می ساڵی 2011".

 

ئاماده‌كردنى : سامان خۆشناو

 


دیجیتاڵ میدیاى سپێده‌

 

له‌ئه‌نجامێكی گه‌وره‌ی چاوه‌ڕوان نه‌كراودا ، یانه‌ی تۆتنهام له‌ قۆناغی یه‌كه‌می جامی ڕابیته‌ی یانه‌كانی ئینگلته‌را ماڵئاوایی كرد ، پاش دۆڕانی به‌ یانه‌ی كۆلچسته‌ر.
به‌ درێژایى یارییه‌كه‌ ، یاریزانانی یانه‌ی تۆتنهام چه‌ندین ده‌رفه‌تی گۆڵ كردنیان له‌ده‌ستدا و نه‌یاتوانی گۆڵ تۆمار بكه‌ن و یارییه‌كه‌ چووه‌ لێدانی یه‌كلاكه‌ره‌وه‌ له‌خاڵی سزا .
له‌ لێدانه‌ یه‌كلاكه‌ره‌وه‌كانیش ، یانه‌ی كۆلچسته‌ر به‌ ئه‌نجامی چوار گۆڵ به‌رامبه‌ر به‌ سێ گۆڵ بردنه‌وه‌ی تۆمار كردوو خۆی گه‌یانده‌ قۆناغی دووه‌م و تۆتنهامیش ماڵئاوایى كرد .
جێگه‌ى باسه‌ یانه‌ى كۆلچسته‌ر یه‌كێكه‌ له‌ یانه‌ به‌شداره‌كانی خولی پله‌ چواری ئینگلته‌را و تۆتنهامیش یانه‌یه‌كى پڕ ئه‌ستێره‌یه‌ و له‌ وه‌رزى رابردووى خولى یانه‌ پاڵه‌وانه‌كانى ئه‌وروپاش له‌ یارى كۆتایى بوو ، به‌ڵام به‌ یانه‌ى لیڤه‌رپول دۆڕا .

 

ئاماده‌كردنى : سامان خۆشناو

 


دیجیتاڵ میدیاى سپێده‌

 

پاش ئه‌وه‌ی میسی بووه‌ باشترین یاریزانی جیهان، یه‌كێتی تۆپی پێی پورتوگالی له‌ په‌ره‌ی تایبه‌تی خۆی له‌ تۆری كۆمه‌ڵایه‌تی تویته‌ر وه‌ڵامی خه‌ڵاته‌كه‌ی میسی دایه‌وه‌ به‌ دانانی وێنه‌یه‌كی كریستیانۆ و له‌سه‌ر وێنه‌كه‌شی نوسیوه‌ ( باشترینه‌ له‌ مێژوودا) .
كریستیانۆ رۆناڵدۆ ئاماده‌ی ئاهه‌نگه‌كه‌ نه‌بوو سه‌ره‌رای ئه‌وه‌ی له‌شاری میلانۆی ئیتاڵی به‌ڕێوه‌چوو، سه‌ره‌رای ئه‌وه‌ی ناوی له‌و سێ یاریزانه‌ بوو كه‌ بۆ ركابه‌ری كۆتایی مابونه‌وه‌، به‌ڵام له‌ پێكهاته‌ی نموونه‌یی ده‌ست نیشان كرا.

 

ئاماده‌كردنى : سامان خۆشناو


دیجیتاڵ میدیاى سپێده‌

 

لیونێل میسی ئه‌رژه‌نتینی هێرشبه‌ری یانه‌ی به‌رشلۆنه‌ی ئیسپانی، خه‌ڵاتی باشترین یاریزانی جیهانی بۆ ساڵی 2019 ، له‌لایه‌ن یه‌كێتی تۆپی پێی جیهانی له‌شاری میلانۆی ئیتاڵی پێدرا.
خه‌ڵاته‌كه‌ له‌لایه‌ن سه‌رۆكی فیفا جیانی ئینفانتینۆ درا به‌ میسی، به‌مه‌ش شوێنی لۆكا مۆدریچی كرواتی یاریزانی ریال مه‌دریدی گرته‌وه‌ كه‌ له‌ساڵی 2018 ئه‌م نازناوه‌ی به‌ده‌ست هێنا بوو.
میسی له‌وه‌رزی رابردوو خولی ئیسپانیا و پله‌ی سێیه‌می كوپا ئه‌مه‌ریكای له‌گه‌ڵ ئه‌رژه‌نتین له‌ به‌رازیل به‌ده‌ست هێنا بوو.
میسی كه‌ گۆڵكاری مێژوویی به‌رشلۆنه‌یه‌، توانی سه‌ركه‌وتن به‌سه‌ر هه‌ریه‌ك له‌ فیرگل ڤان دایكی هۆڵه‌ندی یاریزانی لیڤه‌رپول كه‌ نازناوی خول و جامی سوپه‌ری ئه‌وروپای به‌ده‌ست هێنا بوو به‌ده‌ست بهێنێت، له‌گه‌ڵ سه‌ركه‌وتن به‌سه‌ر كریستیانۆ ڕۆناڵدۆی پورتوگالی هێرشبه‌ری یۆڤنتۆس كه‌ توانی بووی نازناوی خولی ئیتاڵیا و خولی نه‌ته‌وه‌كان له‌ ئه‌وروپا له‌گه‌ڵ پورتوگال بباته‌وه‌.
یه‌كێتی تۆپی پێی جیهانی لیستی ده‌نگه‌ده‌رانی بڵاو كرده‌وه‌ ، میسی توانی 46% ده‌نگه‌كان به‌ده‌ست بهێنێت، پله‌ی دووه‌ومیش بووه‌ به‌شی یاریزانه‌ هۆڵه‌ندیه‌كه‌ فیرگل ڤان دایك به‌ بردنه‌وه‌ی 38% ده‌نگه‌كان و ژماره‌ی ده‌نگه‌كانی تریش بووه‌ به‌شی رۆناڵدۆ.
میسی له‌ ده‌نگدانه‌كه‌ بۆ به‌ده‌ست هێنانی پله‌ی یه‌كه‌م سادیۆ مانی سه‌نیگالی یاریزانی لیڤه‌رپولی له‌پله‌ی یه‌كه‌م ده‌ست نیشان كردبوو، پله‌ی دووه‌میش ده‌نگی به‌ فرینگی دی یۆنگی هۆڵه‌ندی دابوو كه‌ ئێستا له‌ یانه‌كه‌یان یاری ده‌كات.
هه‌رچی ڕۆناڵدۆیه‌ بۆ پله‌ی یه‌كه‌م ده‌نگی به‌ ماتیاس دی لیختی هۆڵه‌ندی دابوو، دی یۆنگی له‌ پله‌ی دووه‌م و مبابێی له‌ پله‌ی سێیه‌م دانابوو.
له‌دوای به‌ده‌ست هێنانی نازناوه‌كه‌ میسی گوتی :" به‌ده‌ست هێنانی نازناوه‌ تاكه‌ كه‌سیه‌كان له‌لای من له‌ پله‌ی دووه‌مدایه‌، نازناوه‌ به‌ كۆمه‌ڵیه‌كان له‌لای من گرنگی زیاتری هه‌یه‌و پله‌ی یه‌كه‌میان هه‌یه‌، دڵخۆشم به‌ بردنه‌وه‌ی ئه‌م نازناوه‌، سوپاسی ئه‌وانه‌ ده‌كه‌م ده‌نگیان پێدام، دڵخۆشم به‌وه‌ی له‌گه‌ڵ خانه‌واده‌كه‌م لێره‌ ئاماده‌م و منداڵه‌كانم تۆپی پێیان خۆش ده‌وێت.

 

ئاماده‌كردنى : سامان خۆشناو

 


دیجیتاڵ میدیاى سپێده‌

 

ئه‌مرۆ ئێواره‌ باشترین یاریزانی جیهان بۆ ساڵی 2019 ، له‌لایه‌ن یه‌كێتی تۆپی پێی جیهانی (فیفا) دیاری ده‌كرێت ، هه‌ریه‌ك لیۆنێل میسی ئه‌رژه‌نتینی و كریستیانۆ ڕۆناڵدۆی پورتوگالی و فیرگل ڤان دایكی هۆڵه‌ندی بۆ بردنه‌وه‌ی نازناوه‌كه‌ له‌ ڕكابه‌ریدان.
له‌ ساڵی رابردوو لۆكا مۆدریچی كرواتی یاریزانی یانه‌ی ریال مه‌درید نازناوی باشترین یاریزانی جیهانی به‌ده‌ست هێنا ، پاش ئه‌وه‌ی توانی له‌گه‌ڵ یانه‌كه‌ی یانه‌ پاڵه‌وانه‌كانی ئه‌وروپا به‌ده‌ست بهێنێت و له‌سه‌ر ئاستی جیهانیش له‌گه‌ڵ كرواتیا پله‌ی دووه‌می مۆندیالی ڕوسیای برده‌وه‌.
ئه‌و سێ یاریزانه‌ی ركابه‌ری بردنه‌وه‌ی باشترین یاریزانی جیهان ده‌كه‌ن له‌ وه‌رزی رابردوو ده‌ستكه‌وته‌كانیان به‌م شێوه‌یه‌ بووه‌ كه‌ له‌م راپۆرته‌دا تیشكیان ده‌خه‌ینه‌ سه‌ر.
كریستیانۆ ڕۆناڵدۆی پورتوگالی له‌ وه‌رزی رابردوو په‌یوه‌ندی به‌ یانه‌ی یۆڤنتۆسی ئیتاڵی كرد ، ئه‌م یاریزانه‌ توانی نازناوی خولی یانه‌كانی ئیتاڵیا له‌گه‌ڵ یانه‌ نوێیه‌كه‌ی به‌ده‌ست بهێنێت و ، له‌ یانه‌ پاڵه‌وانه‌كانی ئه‌وروپاش سه‌ره‌رای ئه‌وه‌ی ئاستێكی به‌رزی پێشكه‌ش كرد له‌ قۆناغی هه‌شته‌می جامه‌كه‌ له‌سه‌ر ده‌ستی یانه‌ی ئه‌یاكس ئه‌مستردام ماڵئاواییان كرد.
له‌گه‌ڵ هه‌ڵبژارده‌ی پورتوگالیش توانی نازناوی خولی نه‌ته‌وه‌كانى ئه‌وروپا به‌ده‌ست بهێنێت ، ئه‌م یاریزانه‌ له‌یاری پێش كۆتایی توانای هاتریك به‌رامبه‌ر به‌ سویسرا تۆمار بكات و تیپه‌كه‌ سه‌ربخات بۆ یاری كۆتایی جامه‌كه‌ و ، له‌یاری كۆتایش توانی نازناوه‌كه‌ به‌ده‌ست بهێنێت پاش ئه‌وه‌ی له‌ هۆڵه‌ندایان برده‌وه‌.
ئه‌م یاریزانه‌ له‌ پێشتردا توانیویه‌تی پێنج جار وه‌ك باشترین یاریزانی جیهان ده‌ست نیشان بكرێت ئه‌مساڵیش هیوای ئه‌وه‌ی هه‌یه‌ بتوانێت بۆ جاری شه‌شه‌مین نازناوه‌كه‌ به‌ده‌ست بهێنێت.
پاڵێوراوی دووه‌می جامه‌كه‌ لیۆنێل میسی ئه‌رژه‌نتینه‌ ، ئه‌م یاریزانه‌ له‌ وه‌رزی رابردوو توانی له‌گه‌ڵ یانه‌ی به‌رشلۆنه‌ نازناوی خولی یانه‌كانی ئیسپانیا به‌ده‌ست بهێنێت و له‌یاری كۆتایی جامی شای ئیسپانیاش توشی دۆڕان بوون.
له‌یانه‌ پاڵه‌وانه‌كانی ئه‌وروپاش ئه‌م یاریزانه‌ له‌ قۆناغی پێش كۆتایی له‌گه‌ڵ به‌رشلۆنه‌ به‌رامبه‌ر لیڤه‌رپول دووچاری شكست بوون و ماڵئاواییان له‌ جامه‌كه‌ كرد.
میسی له‌ وه‌رزی رابردووه‌ بووه‌ گۆڵكاری خوله‌كانی وڵاتانى ئه‌وروپا و به‌ گۆڵكاری یانه‌ پاڵه‌وانه‌كانی ئه‌وروپا ده‌رچوو، به‌باشترین هێرشبه‌ری یانه‌ پاڵه‌وانه‌كانی وه‌رزی رابردووش ده‌ست نیشان كرا.
له‌گه‌ڵ هه‌ڵبژارده‌ی ئه‌رژه‌نتین میسی به‌شداری له‌ كوپا ئه‌مه‌ریكا كرد ، له‌یاری پێش كۆتایی جامه‌كه‌ به‌ به‌رازیل دۆران و بۆ دیاری كردنی پله‌ی سێیه‌م و چواره‌م له‌ چیللیان برده‌وه‌ ، به‌ڵام میسی به‌كارتی سور كرایه‌ ده‌ره‌وه‌ی یاریگاو پاش ئه‌وه‌ی چه‌ند لێدوانێكی توندی دژی یه‌كێتی تۆپی پێی ئه‌مه‌ریكای باشورداو به‌ لایه‌نگری به‌رازیل تۆمه‌تباری كردن بۆ ماوه‌ی دوو مانگ له‌یاری كردن له‌گه‌ڵ ئه‌رژه‌نتین سڕكرا.
یاریزانی سێیه‌م ڤیرگل ڤان دایكی هۆڵه‌ندیه‌، ئه‌م یاریزانه‌ له‌ ریزه‌كانی یانه‌ی لیڤه‌رپولی ئینگلیزی یاری ده‌كات ، ئه‌م یاریزانه‌ رۆڵێكی گه‌وره‌ی بینی له‌ بردنه‌وه‌ی نازناوی یانه‌ پاڵه‌وانه‌كانی ئه‌وروپا له‌ وه‌رزی رابردوو، توانیشی دوو گۆڵ له‌گه‌ڵ یانه‌كه‌ له‌ پاڵه‌وانێتیه‌كه‌ تۆمار بكات.
له‌سه‌ر ئاستی ئینگلته‌راش ئاستێكی به‌رزی له‌ به‌رگری پێشكه‌ش كردوو توانی پله‌ی دووه‌می خولی ئینگلیزی له‌گه‌ڵ یانه‌كه‌ی به‌ده‌ست بهێنێت .
توانیشی نازناوی جامی سوپه‌ری ئه‌وروپاش بباته‌وه‌ پاش ئه‌وه‌ی له‌یاری جامه‌كه‌ به‌ جیاوازی لێدانی یه‌كلاكه‌ره‌وه‌ له‌خاڵی سزا له‌ یانه‌ی چێڵسیان برده‌وه‌.
له‌گه‌ڵ هه‌ڵبژارده‌ی هۆڵه‌نداش توانی بگاته‌ یاری كۆتایی خولی نه‌ته‌وه‌كانى ئه‌وروپا هه‌رچه‌نده‌ له‌یاری كۆتایی جامه‌كه‌ به‌ پورتوگال دۆران ، به‌ڵام ئاستێكی به‌رزی پێشكه‌ش كردوو گۆڵێكی جوانیشی به‌رامبه‌ر ئه‌ڵمانیا تۆمار كرد.
ئه‌م یاریزانه‌ له‌گه‌ڵ میسی و رۆناڵدۆ ركابه‌ر بوون بۆ به‌ده‌ست هێنانی نازناوی باشترین یاریزانی ئه‌وروپا، توانی وه‌ك باشترین یاریزان له‌سه‌ر ئاستی ئه‌وروپا بۆ ساڵی 2019 ده‌ست نیشان بكرێت، ئه‌مه‌ له‌ خاڵه‌ به‌هێزه‌كانی ئه‌م یاریزانانه‌ بوو كه‌ ركابه‌ری له‌سه‌ر نازناوی باشترینه‌كانی ئه‌وروپا ده‌كه‌ن.

 

ئاماده‌كردنى : سامان خۆشناو

 


دیجیتاڵ میدیاى سپێده‌

 

دوای دۆرانی له‌ یانه‌ پاڵه‌وانه‌كانی ئه‌وروپا به‌سێ گۆڵی بێ به‌رامبه‌ر له‌گه‌ڵ پاریس سان جێرمان له‌ جه‌وله‌ی پێنجه‌می لالیگا ڕیال مه‌درید له‌ گه‌شتێكی پڕ له‌مه‌ترسی به‌رامبه‌ر ئیشبیلیه‌ یاری ده‌كات.
دوای ئه‌و دۆڕانه‌ گه‌وره‌یه‌ له‌سه‌ر ڕیال مه‌درید پێویسته‌ كه‌ له‌لایه‌ن زێدانی فه‌ره‌نسی مه‌شقی پێ ده‌درێته‌وه‌ یاریزانه‌كان وا هان بدات قه‌ره‌بۆی ئه‌و شكسته‌ له‌ به‌رامبه‌ر ئیشبیلیه‌ بكه‌نه‌وه‌.
گۆلین لۆبیتیگی كه‌ له‌ وه‌رزی رابردوو له‌ ئه‌ركی مه‌شقدانه‌وه‌ی ڕیال مه‌درید دوور خرایه‌وه‌ له‌ چوار جه‌وله‌ی ئه‌م وه‌رزه‌ی خوله‌كه‌ به‌ كۆكردنه‌وه‌ی 10 خاڵ پێشه‌نگی لالیگای گرتبوو به‌ جیاوازی دوو خاڵ له‌ پێش ڕیال مه‌دریدی سێیه‌م بوو.
له‌سه‌ر ڕاهێنه‌ری پێشووی هه‌ڵبژارده‌ی ئیسپانیا پێویسته‌ له‌گه‌ڵ یاریزانی لاو سێرجیۆ ریگیلۆن كه‌ به‌ خواستن له‌ ریال مه‌درید په‌یوه‌ندی به‌ ئیشبیلیه‌ كردووه‌ خۆیان بسه‌لمێنن ئازاره‌كانی تیپی پێشوویان زیاتر بكه‌ن.
هه‌رچی زێدانه‌ ئه‌م وه‌رزه‌ كێشه‌ی زۆری هه‌یه‌ پێشبینی ده‌كرێت بۆ ئه‌م یارییه‌ فیرلاند مێندی بۆ یاری كردن ئاماده‌بێت كه‌ بۆ شوێن گرتنه‌وه‌ی مارسیلۆ گرێبه‌ستی له‌گه‌ڵ واژوو كردووه‌.
له‌ ئێستادا پاڵه‌په‌ستۆیه‌كی زۆر له‌سه‌ر زێدانی ڕاهێنه‌ر هه‌یه‌ ئه‌م ئه‌ركه‌ قورسه‌ی چاوه‌ڕێی ده‌كات ره‌نگه‌ كێشه‌كانی زیاتر بكات چونكه‌ مه‌ترسی له‌سه‌ر كارلادانی لێ ده‌كرێت ، ره‌نگه‌ به‌هۆی پێكانه‌وه‌ هه‌ریه‌ك له‌ لۆكا مۆدریچ و ئیسكۆ و ئه‌سینسیۆ نه‌توانن به‌شداری له‌م یارییه‌دا بكه‌ن، ئه‌مه‌ش ئه‌ركی زێدان زیاتر قورس ده‌كات چونكه‌ به‌دوای ئه‌وه‌ ده‌گه‌ڕێت چیتر توشی دۆران نه‌بێت و كێشه‌كانی تیپه‌كه‌ی چاره‌سه‌ر بكات و درێژه‌ به‌سه‌ركه‌وتنه‌كان بدات كه‌ له‌ جه‌وله‌ی رابردووی خولی ئیسپانیاش به‌ زه‌حمه‌ت له‌سه‌ر یاریگای خۆی له‌ لیڤانتی برده‌وه‌.
هه‌رچی ئیشبیلیه‌یه‌ سه‌ره‌رای ئه‌وه‌ی له‌سه‌ر ئاستی ناوه‌خۆ ئاستێكی به‌رزی پێشكه‌ش كردووه‌ ، له‌ خولی ئه‌وڕوپیش به‌ بردنه‌وه‌ ده‌ستی پێ كردوو به‌ سێ گۆڵ له‌ كاراباگ ئه‌گدامی برده‌وه‌، ئه‌مه‌ش ئه‌وه‌نده‌ی تر وره‌ی یاریزانانی تیپه‌كه‌ی بۆ یاری به‌رامبه‌ر ڕیال مه‌درید به‌رز كردۆته‌وه‌ به‌تایبه‌تیش له‌سه‌ر یاریگا و به‌رده‌م هانده‌رانیان یاری ده‌كه‌ن نایانه‌وێت به‌هیچ شێوه‌یه‌ك خاڵه‌كان له‌ده‌ست بده‌ن و ده‌یانه‌وێت له‌گه‌ڵ كۆتایی هاتنی ئه‌م جه‌وله‌یه‌ پارێزگاری له‌ پێشه‌نگی یانه‌كان بكه‌ن.

 

ئاماده‌كردنى : سامان خۆشناو

 


دیجیتاڵ میدیاى سپێده‌

 

یانه‌ی غه‌رناته‌ دووه‌مین دۆڕانی له‌م وه‌رزه‌ی خولی یانه‌كانی ئیسپانیا توشی یانه‌ی به‌رشلۆنه‌ كرد ، كاتێك له‌ یاریگای خۆی له‌ یارییه‌كانی جه‌وله‌ی پێنجه‌می خوله‌كه‌ به‌ دوو گۆڵی بێ وه‌ڵام بردنه‌وه‌ى له‌ به‌رامبه‌ر تۆماركرد .
هه‌ر له‌گه‌ڵ ده‌ستپێكردنی یارییه‌كه‌ به‌ دوو خوله‌ك (رامۆن عه‌زیز ) گۆڵی یه‌كه‌می بۆ یانه‌ی غه‌رناته‌ تۆماركرد ، سه‌ره‌رای هه‌وڵه‌كانی یانه‌ی به‌رشلۆنه‌ ، به‌ڵام ئه‌م گێمه‌ به‌م ئه‌نجامه‌ كۆتایی هات .
له‌ گێمی دووه‌م به‌رشلۆنه‌ له‌هه‌وڵه‌كانی به‌رده‌وام بوو ، كه‌چى نه‌یتوانی گۆڵی به‌رامبه‌ر تۆمار بكات و ، له‌خوله‌كی (66) دا (ئه‌لڤارۆ فادیۆ) به‌ لێدانی سزا گۆڵی دووه‌می تۆمار كرد، ئه‌نجامی یارییه‌كه‌ش تا كۆتایی به‌م شێوه‌یه‌ مایه‌وه‌، به‌م بردنه‌وه‌یه‌ش غه‌رناته‌ بووه‌ خاوه‌نی 10 خاڵ به‌شێوه‌یه‌كی كاتی هاته‌ پێشه‌نگی یانه‌كان ، به‌رشلۆنه‌ش به‌ حه‌فت خاڵ به‌شێوه‌یه‌كی كاتی له‌ پله‌ی حه‌فته‌می ریزبه‌ندی مایه‌وه‌ .
له‌دوای یارییه‌كه‌ش ڤالڤێردی ڕاهێنه‌ری به‌رشلۆنه‌ رایگه‌یاند من به‌رپرسم له‌ دۆرانی تیپه‌كه‌م، نیگه‌رانم یاریزانه‌كان به‌م ئاسته‌ خراپه‌ به‌دیاركه‌وتن و توشی سه‌رسامی بووین له‌ ئاست به‌رزی تیپی به‌رامبه‌ر.

 

ئاماده‌كردنى : سامان خۆشناو