گرنگترین مانشێتەکان
نیشان دان به‌پێی به‌روار : تشرینی دووەم 2019

باسل گۆرگیسی به‌ڕێوه‌به‌ری كارگێری هه‌ڵبژارده‌ی عێراق رایگه‌یاند عه‌لی عه‌دنان به‌هۆی سزادانه‌وه‌ ناتوانێت له‌یاری به‌رامبه‌ر به‌حرێن به‌شداری بكات و سه‌رجه‌م ئه‌و یاریزانانه‌ش كه‌ پێكانیان هه‌یه‌ گه‌ڕاونه‌ته‌وه‌ تیپه‌كه‌.
گۆرگێس له‌ لێدوانێكدا گوتی :" عه‌لی عه‌دنان له‌یاری سێ شه‌ممه‌ی داهاتوو به‌شداری ناكات، به‌ڵام هه‌ریه‌ك له‌ موهه‌نه‌د عه‌لی و محمد حه‌مید گه‌ڕانه‌وه‌ مه‌شقه‌كان پاش ئه‌وه‌ی له‌یاری به‌رامبه‌ر ئێران توشی پێكانێكی سوك هاتن.

سه‌رجه‌م یاریزانه‌كان به‌وره‌یه‌كی به‌رز یارییه‌كه‌ ئه‌نجام ده‌ده‌ن به‌تایبه‌تی دوای بردنه‌وه‌ له‌ ئێران رێگایه‌كی دروستمان بڕێوه‌ بۆ گه‌یشتن به‌ قۆناغی داهاتووی پاڵاوتنه‌كان.
یاری عێراق و به‌حرێن له‌سه‌ر یاریگای عه‌مانی نێوده‌وڵه‌تی له‌ پایته‌ختی ئوردن ئه‌نجام ده‌درێت له‌میانه‌ی جه‌وله‌ی پێنجه‌می پاڵاوتنی جامی جیهانی و جامی ئاسیا.

 


محمد سه‌ڵاحی ئه‌ستێره‌ی یانه‌ی لیڤه‌رپول له‌ مه‌شقه‌كانی سێ شه‌ممه‌ی هه‌ڵبژارده‌ی له‌سه‌ر یاریگای بورج عه‌ره‌ب له‌ ئه‌سكه‌نده‌رییه‌ به‌شداری نه‌كرد كه‌ تیپه‌كه‌ی خۆی بۆ یاری به‌رامبه‌ر كینیا له‌ پاڵاوتنه‌كانی جامی ئه‌فریقیا ئاماده‌ ده‌كات كه‌ بریاره‌ یارییه‌كه‌ پێنج شه‌ممه‌ ئه‌نجام بدرێت.
به‌هۆی ئازاری پێكانه‌كه‌ی سه‌لاح له‌سه‌ر پلیكانی یه‌ده‌گه‌كه‌كان ته‌نها بینه‌ری مه‌شقه‌كان بوو كه‌ له‌دواین یاری تیپه‌كه‌ی به‌رامبه‌ر به‌ مانچسته‌رسیتی توشی بوو له‌خولی ئینگلیزی.
سه‌ڵاح له‌یاری به‌رامبه‌ر كینیا و دوورگه‌كانی قه‌مه‌ر به‌شداری ناكات، حسام به‌دری راهێنه‌ر به‌شداری نه‌كردنی سه‌لاحی یه‌كلایی كرده‌وه‌.
سه‌لاح له‌ كامپی مه‌شقی میسر له‌ تشرینی یه‌كه‌می رابردوو به‌هۆی پێكانه‌وه‌ به‌شداری نه‌كرد.

 


راپۆرته‌ رۆژنامه‌وانیه‌كان له‌ ئیتاڵیا ئاشكرای ده‌كه‌ن یانه‌ی مانچسته‌ریۆنایتد به‌شێوه‌یه‌كی جدی بیر له‌وه‌ ده‌كاته‌وه‌ جارێكی تر ده‌رگای گفتوگۆ له‌گه‌ڵ كریستیانۆ رۆناڵدۆی پورتوگالی بكاته‌وه‌و گرێبه‌ستی له‌گه‌ڵ بكات و بۆ ریزه‌كانی بیگوازێته‌وه‌.
ماڵپه‌ری كاڵچۆ میركاتۆ رایگه‌یاندووه‌ ئیدوو دواردی جێگری سه‌رۆكی یانه‌ی مانچسته‌ریۆنایتد گفتوگۆی له‌گه‌ڵ كارگێری یانه‌كه‌ی كردووه‌ باسی بیرۆكه‌ی مۆركردنی گرێبه‌ستی له‌گه‌ڵ كریستیانۆ رۆناڵدۆی ته‌مه‌ن 34 ساڵه‌ی یاریزانی یانه‌ی یۆڤنتۆس كردووه‌ كه‌ ئێستا له‌ دۆخێكی خراپدایه‌ له‌گه‌ڵ یانه‌كه‌ی.
كارگێرانی یانه‌ی مانچسته‌ریۆنایتد ئه‌م كاته‌ به‌ كاتێكی نموونه‌یی ده‌زانن بۆ گفتوگۆكردن له‌گه‌ڵ رۆناڵدۆ چونكه‌ ئه‌م یاریزانه‌ كێشه‌ی هه‌یه‌ له‌گه‌ڵ ساری ڕاهێنه‌ری یۆڤنتۆس.
كاڵچۆ میركاتۆ رایگه‌یاندووه‌ ئه‌گه‌ر كێشه‌كانی نێوان رۆناڵدۆ و ڕاهێنه‌ر زیاتر گه‌شه‌ بكه‌ن ئه‌وا رۆناڵدۆ له‌ ماوه‌یه‌كی نزیك ریزه‌كانی یانه‌ ئیتاڵیه‌كه‌ جێده‌هێڵێت.
رۆناڵدۆ له‌وكاته‌ی له‌ساڵی 2003 له‌ سپۆرتینگ لشبۆنه‌ په‌یوه‌ندی به‌ مانچسته‌ریۆنایتد كرد ئاستێكی به‌رزی پێشكه‌ش كرد توانی نازناوی یانه‌ پاڵه‌وانه‌كانی ئه‌وروپا له‌گه‌ڵ تیپه‌كه‌ له‌ساڵی 2008 به‌ده‌ست بهێنێت له‌هه‌مان ساڵ توانی بۆ جاری یه‌كه‌مین له‌ مێژوویدا خه‌ڵاتی تۆپی زێڕین بباته‌وه‌ وه‌ك باشترین یاریزانی جیهان به‌ر له‌وه‌ی له‌ساڵی 2009 بۆ یاری كردن په‌یوه‌ندی به‌ ریال مه‌درید بكات.
هانده‌ران توشی سه‌رسامی بوون له‌ ساری راهێنه‌ر چونكه‌ له‌ دوو یاری رابردووی تیپه‌كه‌ به‌رامبه‌ر به‌ لۆكۆمۆتیف مۆسكۆی روسی و میلان رۆناڵدۆی له‌ یاریگا ده‌رهێنا و دیبالای خسته‌ شوێنی.
وێنه‌گرانی ناو یاریگا زوومی كامێراكانیان به‌ ئاڕاسته‌ی رۆناڵدۆ سوڕاند تیایدا توڕه‌یی رۆناڵدۆیان نیشاندا كه‌ پێشتر چ له‌ مانچسته‌ر یۆنایتد یانیش له‌ ریال مه‌درید به‌م شێوه‌یه‌ توڕه‌ نه‌بووه‌.
له‌باره‌ی ئه‌م رووداوه‌ش ساری ڕاهێنه‌ر گوتی :" ئه‌و هه‌موو شتێكی كرد بۆ ئه‌وه‌ی یاری بكات به‌ڵام من بروام وابوو ته‌ندروستی باش نیه‌ به‌ باشترم زانی له‌ یاریگا بێته‌ ده‌ره‌وه‌".
گوتیشی:" ئاساییه‌ هه‌ر یاریزانێك توڕه‌بێت به‌هۆی هێنانه‌ ده‌ره‌وه‌ی له‌ یاریگا، به‌تایبه‌تی ئه‌و یاریزانه‌ی هه‌موو توانای خۆی به‌كار بخات له‌ یاریگا، له‌ مانگی رابردوو چه‌ند ئازارێكی له‌ ڕانی هه‌بوو، له‌ مه‌شقه‌كانیش له‌ به‌سته‌ره‌كانی توشی پێكان بووه‌، ئه‌م یاریزانه‌ پێویستی به‌ پشوو هه‌یه‌.
رۆناڵدۆ له‌ هاوینی 2018 له‌ ریال مه‌درید په‌یوه‌ندی به‌ یۆڤنتۆس كرد ئه‌م گرێبه‌سته‌ هه‌موولایه‌كی توشی سه‌رسوڕمان كرد، به‌تایبه‌تی ئه‌م یاریزانه‌ سێ ساڵ له‌دوای یه‌ك نازناوی یانه‌ پاڵه‌وانه‌كانی ئه‌وروپای بۆ ریال مه‌درید به‌ده‌ست هێنا بوو.


به‌رپرسانی بایرن میونخ پلانی ئه‌وه‌یان داناوه‌ له‌ چه‌ند رۆژی داهاتوو گفتوگۆ له‌گه‌ڵ هانز فلیكی راهێنه‌ری كاتی بایرن میونخ بكه‌ن بۆ ئه‌وه‌ی بزانن ئاماده‌یه‌ مه‌شقی یانه‌كه‌ به‌شێوه‌یه‌كی بنه‌ره‌تی بداته‌وه‌ یاخود نا.
ئه‌م راهێنه‌ره‌ دوای دۆرانی بایرن میونخ به‌ ئینتراخت فرانكفۆرت به‌ پێنج گۆڵ به‌رامبه‌ر به‌ گۆڵێك شوێنی كۆڤاچی گرته‌وه‌.
له‌ دوو یاری سه‌رپه‌رشتی بایرن میونخی كردووه‌ به‌رامبه‌ر ئۆڵۆمپیاكۆس له‌ یانه‌ پاڵه‌وانه‌كانی ئه‌وروپا به‌ دوو گۆڵی بێ به‌رامبه‌ر براوه‌ بوون و له‌ خولی ئه‌ڵمانیا به‌رامبه‌ر دۆرتمۆند به‌ چوار گۆڵی بێ به‌رامبه‌ر براوه‌ بوون.
بریاره‌ فیلیك تا كۆتایی نیوه‌ی یه‌كه‌م له‌ پۆسته‌كه‌ی به‌رده‌وام بێت و پاشان گفتوگۆی له‌گه‌ڵ بكرێت تا ماوه‌یه‌كی زیاتر له‌گه‌ڵ تیپه‌كه‌ به‌رده‌وام بێت، به‌رپرسانی بایرن میونخ دڵخۆش به‌ ئه‌نجامه‌كانی و ده‌یانه‌وێت ماوه‌یه‌كی زۆر له‌گه‌ڵ تیپه‌كه‌یان به‌رده‌وام بێت.

 


به‌هۆی ئه‌نجامه‌ خراپه‌كانی یانه‌ی ئه‌رسناڵ ئێستا تیپه‌كه‌ پله‌ی شه‌شه‌می ریزبه‌ندی گرتوه‌.
رۆژنامه‌ی زه‌سه‌نی به‌ریتانی رایگه‌یاندووه‌ ئه‌نریكی نایه‌وێت ئه‌ركی مه‌شقدانه‌وه‌ی ئه‌رسناڵ له‌ ئه‌ستۆ بگرێت و ئه‌م راهێنه‌ره‌ له‌م كاته‌دا ره‌تی كردۆته‌وه‌ بگه‌ڕێته‌وه‌ جیهانی تۆپی پێ.
ئه‌نریكی له‌ حوزه‌یرانی رابردوو وازی ڕاهێنه‌ری هه‌ڵبژارده‌ی ئیسپانیا هێنا دوای ده‌ست به‌كار بوونی بۆ ماوه‌یه‌ك، دوای وازهێنانیشی به‌ ماوه‌یه‌ك كچه‌ نۆ ساڵیه‌كه‌ی به‌هۆی نه‌خۆشی كۆچی دوایی كرد.
ئه‌نریكی سه‌ره‌رای ئه‌وه‌ی نایه‌وێت مه‌شقی ئه‌رسناڵ بداته‌وه‌، نایه‌وێت له‌ ناوه‌راستی وه‌رز مه‌شقی هیچ تیپێك بداته‌وه‌ ده‌یه‌وێت خۆی سه‌رپه‌رشتی پرۆژه‌یه‌ك بكات.

 



پاش ئه‌وه‌ی زۆرێك له‌ یاریزانانی یانه‌ی ناپۆلی تیپه‌كه‌یان توشی كێشه‌ كرده‌وه‌، ئۆریلۆ دی لۆرینتیسی سه‌رۆكی یانه‌كه‌ دوای دۆرانیان به‌رامبه‌ر به‌ رۆما له‌ خولی ئیتاڵیا له‌ هه‌فته‌ی رابردوو بریاریدا مه‌شقێكی داخراو ئه‌نجام بده‌ن سه‌ره‌رای ئه‌وه‌ی ڕاهێنه‌ری یانه‌كه‌ ئه‌نشلۆتی ئه‌مه‌ی ره‌ت كرده‌وه‌.
به‌گوێره‌ی رۆژنامه‌ی دیلی میلی ئینگلیزی ئۆریلۆ پلانی ئه‌وه‌ی داناوه‌ ده‌ست به‌رداری به‌شێك له‌ ئه‌ستێره‌كانی تیپه‌كه‌ی بێت پاش ئه‌وه‌ی كێشه‌ كه‌وتۆته‌ ناو یانه‌كه‌ی.
یاریزانانی یانه‌ی ناپۆلی دوای یارییان به‌رامبه‌ر به‌ رید بۆل سالسبۆرگی نه‌مسا ره‌تی ئه‌وه‌یان كردۆته‌وه‌ له‌سه‌ر بریاری سه‌رۆكی یانه‌كه‌ په‌یوه‌ندی به‌ مه‌شقه‌كان بكه‌ن.
یاخیبوونی یاریزانه‌كان بۆته‌ جێگه‌ی توڕه‌یی سه‌رۆكی یانه‌كه‌و بریاریداوه‌ به‌ فرۆشتنی به‌شێك له‌ ئه‌ستێره‌كانی تیپه‌كه‌ بۆ ئه‌وه‌ی كێشه‌كانی یانه‌كه‌ كه‌م بكاته‌وه‌.
سه‌رۆكی یانه‌كه‌ ده‌یه‌وێت به‌ ئارامی ده‌ست به‌رداری ته‌واوی ئه‌ستێره‌كانی تیپه‌كه‌ی بێت بۆ ئه‌مه‌ش ده‌یه‌وێت كاتی پێویستی له‌به‌ر ده‌ست بێت.
رۆژنامه‌ی لاگازێتا دیلۆ سپۆرتی ئیتاڵی ئاشكرای كردووه‌ درایس میرتینیزی به‌لجیكی له‌سه‌رووی ئه‌و یاریزانانه‌ ده‌بێت له‌ یانه‌ی ناپۆلی ده‌روات، یانه‌ی ئه‌نته‌رمیلان هه‌وڵ ده‌دات له‌ گواستنه‌وه‌ی زستانه‌ی داهاتوو گرێبه‌ست له‌گه‌ڵ ئه‌م یاریزانه‌ به‌لجیكیه‌ واژوو بكات.
به‌گوێره‌ی رۆژنامه‌كه‌ میرتینیز ره‌نگه‌ رێككه‌وتنی له‌گه‌ڵ به‌رپرسانی نیراتزۆری كردبێت تا په‌یوه‌ندی به‌ ریزه‌كانیان بكات.
پێشبینی ده‌كرێت ئه‌م یاریزانه‌ بۆ دوو ساڵ گرێبه‌ست له‌گه‌ڵ یانه‌ی ئه‌نته‌رمیلان واژوو بكات بۆ هه‌ر وه‌رزێك بڕی شه‌ش ملیۆن یۆرۆی پێ بدرێت.
سه‌رۆكی یانه‌ی ناپۆلیش نایه‌وێت پارێزگاری له‌ مانه‌وه‌ی ئه‌م یاریزانه‌ بكات به‌هۆی ئه‌و موچه‌ به‌رزه‌ی پێی ده‌درێت، مه‌رجیشی بۆ مانه‌وه‌ی ئه‌م یاریزانه‌ كه‌م كردنه‌وه‌ی موچه‌كه‌یه‌تی، ئه‌م یاریزانه‌ش ده‌توانێت به‌ر له‌كۆتایی ئه‌م وه‌رزه‌ گفتوگۆ له‌گه‌ڵ هه‌ر یانه‌یه‌ك بكات كه‌ په‌یوه‌ندی به‌ ریزه‌كانی بكات.
جگه‌ له‌ درایس میرتینز یاریزانێكی تر له‌ لیسته‌كه‌ی دی لۆرینتیس بوونی هه‌یه‌ بۆ ده‌ست به‌ردار بوون ئه‌ویش یاریزانی به‌لجیكی خالیدۆ كۆلیبالیه‌ ، به‌گوێره‌ی دیلی مێل كۆلیبالی یه‌كێكه‌ له‌ دیارترین یاریزانه‌كانی به‌رگری له‌ جیهان ئاماده‌یه‌ له‌ گواستنه‌وه‌ی هاوینه‌ی داهاتوو له‌ ناپۆلی بروات.
هه‌ر له‌ لیسته‌كه‌ی سه‌رۆكی ناپۆلی ناوی هه‌ریه‌ك له‌ لۆرینزۆ ئنسینی و هاسیگای و فه‌وزی غولام هاتوه‌و داهاتوویان له‌گه‌ڵ یانه‌كه‌ نادیار ده‌بێت.
سه‌رۆكی یانه‌كه‌ هه‌ڕه‌شه‌ی له‌ ئه‌نشلۆتی و یاریزانه‌كان كردووه‌ به‌شێوه‌یه‌كی یاسایی هه‌ڵسوكه‌وتیان له‌گه‌ڵ ده‌كات به‌هۆی ئه‌و یاخی بونه‌وه‌ی ئه‌نجامیان داوه‌.
به‌گوێره‌ی ماڵپه‌ری كاڵچۆ میركاتۆ كارلۆ ئه‌نشلۆتی هه‌ڕه‌شه‌ی ئه‌وه‌ی كردووه‌ به‌ر له‌كۆتایی ئه‌م وه‌رزه‌ له‌ تیپه‌كه‌ بروات به‌هۆی بریاره‌كانی سه‌رۆكی یانه‌.
یاریزانانی ناپۆلی ره‌تی ئه‌وه‌یان كردۆته‌وه‌ به‌ پاسی تایبه‌تی یانه‌كه‌یان به‌ره‌و یاریگا بچن و به‌ ئۆتۆمبێلی تایبه‌تی خۆیان به‌ره‌و یاریگا هاتوون ، به‌گوێره‌ی ماڵپه‌ره‌كه‌ سه‌رۆكی یانه‌ به‌ هه‌ڵویستی راهێنه‌ر رازی نیه‌ و بروای وایه‌ هه‌ڵوێسته‌كه‌ی به‌شێوه‌یه‌كه‌ كه‌س ئیره‌یی پێ نابات.
به‌گوێره‌ی كاڵچۆ میركاتۆ سه‌رۆكی یانه‌ی ناپۆلی هیوای زۆری به‌ تیپه‌كه‌ی هه‌بووه‌و له‌گه‌ڵ دۆخی ئێستای تیپه‌كه‌ هیواكانی یه‌ك ناگرنه‌وه‌.

 


یانه‌ی شورته‌ نیگه‌رانی خۆی نیشاندا له‌ بانگهێشت كردنی به‌شێك له‌ یاریزانانی تیپه‌كه‌ی بۆ ریزی هه‌ڵبژارده‌ی یه‌كه‌می عێراق كه‌ بریاره‌ به‌شداری له‌ جامی كه‌نداوی عه‌ره‌بی 24 بكه‌ن له‌وڵاتی قه‌ته‌ر.
واده‌ی به‌ڕێوه‌چوونی یاری هه‌ڵبژارده‌ی عێراق له‌ جامه‌كه‌ هاوكاته‌ له‌گه‌ڵ به‌ڕێوه‌چوونی یاری گه‌ڕانه‌وه‌ی قۆناغی 16می یانه‌ی شورته‌ به‌رامبه‌ر به‌ یانه‌ی نوازیبۆی مۆریتانی له‌میانه‌ی یارییه‌كانی پاڵه‌وانێتی یانه‌ پاڵه‌وانه‌كانی عه‌ره‌بی شه‌شه‌مین.
حوسێن عه‌بدوالواحیدی یاریده‌ده‌ری ڕاهێنه‌ری یانه‌ی شورته‌ له‌ لێدوانێكی تایبه‌ت گوتی :" یاری گه‌رانه‌وه‌ی قۆناغی 16می یانه‌ پاڵه‌وانه‌كانی عه‌ره‌بی بریاره‌ له‌ 25 ئه‌م مانگه‌ ئه‌نجام بدرێت ئه‌مه‌ش هه‌مان كاته‌ له‌گه‌ڵ به‌ڕێوه‌چوونی یارییه‌كانی جامی كه‌نداوی عه‌ره‌بی كه‌ بریاره‌ له‌ 24 ئه‌م مانگه‌ له‌ قه‌ته‌ر ده‌ست پێ بكات.
عه‌بدولواحید گوتیشی :" هه‌شت یاریزانی تیپه‌كه‌مان له‌ ریزی هه‌ڵبژارده‌ی عێراق یاری ده‌كه‌ن ، به‌شداری نه‌كردنی ئه‌م یاریزانانه‌ له‌گه‌ڵ تیپه‌كه‌مان كێشه‌یه‌كی گه‌وره‌ له‌به‌رده‌م یانه‌كه‌ دروست ده‌كات چونكه‌ یارییه‌كی گرنگمان هه‌یه‌ به‌رامبه‌ر به‌ یانه‌ی نوازیبۆ، ئه‌مه‌ش كێشه‌یه‌كی گه‌وره‌یه‌ پێویسته‌ به‌ خێرایی چاره‌سه‌ر بكرێت تا یاریزانه‌كان په‌یوه‌ندی به‌ تیپه‌كه‌ بكه‌نه‌وه‌و خۆیان بۆ یاری گه‌رانه‌وه‌ ئاماده‌ بكه‌ن.
كارگێری یانه‌كه‌ش گوتی ده‌بێت هه‌ردوولامان بگه‌ین به‌ رێككه‌وتن ، تا یانه‌كه‌ زه‌ره‌ری پێ نه‌گات چونكه‌ جامی كه‌نداو جامێكی فه‌رمی نیه‌، شورته‌ پێویسته‌ پارێزگاری له‌ یاریزانه‌كانی بكات چونكه‌ ئه‌ركی به‌رامبه‌ر به‌ یانه‌ مۆریتانیه‌كه‌ ئاسان نیه‌.
بریاریشه‌ رۆژی سێ شه‌ممه‌ یانه‌ی شورته‌ ده‌ست به‌ مه‌شق و ئاماده‌كارییه‌كانی بكات بۆ یاری گه‌ڕانه‌وه‌و چاوه‌ڕوانی ڕه‌زامه‌ندی یه‌كێتی تۆپی پێی عه‌ره‌بی ده‌كه‌ن یارییه‌كه‌ له‌سه‌ر یاریگای فه‌ڕه‌نسۆ هه‌ریری له‌شاری هه‌ولێر ئه‌نجام بدرێت.
له‌ ئێستادا هه‌شت یاریزانی شورته‌ بۆ هه‌ڵبژارده‌ی عێراق بانگهێشت كراون كه‌ بریتین له‌ محمد حه‌مید و سه‌عد ناتق و زه‌رغام ئیسماعیل و عه‌لا مه‌هاوی و عه‌لی فائیز و سه‌فا هادی و ئه‌مجه‌د عه‌توان و عه‌لا عه‌بدول زه‌هره‌".


دوای دوو به‌رامبه‌ر بوونی له‌سه‌ریه‌ك یانه‌ی ئه‌تله‌تیكۆمه‌درید له‌سه‌ر یاریگای خۆی له‌ یارییه‌كانی جه‌وله‌ی 13می خولی ئیسپانیا به‌ سێ گۆڵ به‌رامبه‌ر به‌ گۆڵێك له‌ ئیسپانیۆڵی برده‌وه‌.
سێرجی داردێر له‌خوله‌كی 38 گۆڵی پێشكه‌وتنی بۆ ئیسپانیۆڵ تۆمار كرد گێمی یه‌كه‌میش به‌م گۆڵه‌ كۆتایی هات.
له‌گه‌ڵ ده‌ست پێكردنه‌وه‌ی گێمی دووه‌م به‌ یه‌ك خوله‌ك ئه‌نخل كۆریا گۆڵی به‌رامبه‌ری بۆ ئه‌تله‌تیكۆمه‌درید تۆمار كرده‌وه‌، پاشان له‌خوله‌كی 58 ئه‌لڤارۆ مۆراتا یانه‌ مه‌دریدیه‌كه‌ی كرده‌ خاوه‌ن گۆڵی دووه‌م، له‌خوله‌كی یه‌كه‌می كاتی به‌فیرۆچووش خۆرخی كوكی گۆڵی سێیه‌می تۆمار كرد، به‌م بردنه‌وه‌یه‌ش ئه‌تله‌تیكۆمه‌درید به‌ 24 خاڵ پله‌ی سێیه‌می ریزبه‌ندی گرتوه‌.

 


له‌یاری لوتكه‌ی جه‌وله‌ی 12می خولی یانه‌كانی ئیتاڵیا یانه‌ی یۆڤنتۆس به‌ زه‌حمه‌ت به‌ گۆڵێكی بێ به‌رامبه‌ر له‌ میلانی برده‌وه‌و گه‌ڕایه‌وه‌ پێشه‌نگی یانه‌كان.

له‌ گێمی یه‌كه‌م هه‌ردوو یانه‌ چه‌ند ده‌رفه‌تێكی ئاسانی گۆڵ كردنیان له‌ده‌ستدا، یۆڤنتۆس له‌لایه‌ن هیگواین و میلانیش له‌لایه‌ن بیوتیك ئه‌م گێمه‌ش به‌بێ گۆڵ كۆتایی هات.

له‌ گێمی دووه‌م یانه‌ی یۆڤنتۆس هه‌وڵیدا گۆڵی بردنه‌وه‌ تۆمار بكات و له‌خوله‌كی 55 ڕاهێنه‌ر كریستیانۆ رۆناڵدۆی له‌ یاریگا ده‌رهێناو دیبالا شوێنی گرته‌وه‌ ئه‌مه‌ش بووه‌ هۆكاری توره‌یی رۆناڵدۆ و به‌گوێره‌ی سكای سپۆرت رۆناڵدۆ به‌ر له‌كۆتایی یارییه‌كه‌ به‌ سێ خوله‌ك له‌ یاریگا رۆیشتوه‌و یاریگای جێهێشتوه‌.

له‌م گێمه‌ش یۆڤنتۆس و میلان پێشبركێیان بووه‌ له‌سه‌ر به‌هه‌ده‌ردانی ده‌رفه‌ته‌كان و گۆڵی بردنه‌وه‌ی یۆڤنتۆس له‌لایه‌ن پاوڵۆ دیبالا له‌خوله‌كی 77 تۆمار كرا یارییه‌كه‌ش به‌م گۆڵه‌ كۆتای هات، به‌م بردنه‌وه‌یه‌ش یۆڤنتۆس بووه‌ خاوه‌نی 32 خاڵ گه‌ڕایه‌وه‌ پێشه‌نگ میلانیش به‌ 13 خاڵ پله‌ی 14می ریزبه‌ندی گرتوه‌و ئه‌مه‌ش دۆرانی حه‌فته‌م بوو له‌م وه‌رزه‌ توشی بوو.

 

 


ئه‌نته‌رمیلان هاته‌وه‌ پێشه‌نگی یانه‌كانی خولی ئیتاڵیا به‌شێوه‌یه‌كی كاتی كاتێك له‌ جۆزیپی میاتزا به‌ دوو گۆڵ به‌رامبه‌ر به‌ گۆڵێك له‌ هیلاس ڤیرۆنای برده‌وه‌.
فالیریۆ فێری له‌خوله‌كی 19 به‌ لێدانی سزا گۆڵی پێشكه‌وتنی بۆ هیلاس ڤیرۆنا تۆمار كرد سه‌ره‌رای هه‌وڵه‌كانی ئه‌نته‌رمیلان گێمی یه‌كه‌م به‌م ئه‌نجامه‌ كۆتایی هات.
له‌خوله‌كی 65 ماتیاس فیچینۆ گۆڵی به‌رامبه‌ری بۆ ئه‌نته‌رمیلان تۆمار كرده‌وه‌،له‌خوله‌كی 83 نیكۆلا بارێلا گۆڵی بردنه‌وه‌ی بۆ ئه‌نته‌رمیلان تۆمار كرد، یارییه‌كه‌ش به‌م ئه‌نجامه‌ كۆتایی هات، به‌م بردنه‌وه‌یه‌ش ئه‌نته‌رمیلان به‌ كۆكردنه‌وه‌ی 31 خاڵ به‌شێوه‌یه‌كی كاتی پێشه‌نگی وه‌رگرته‌وه‌.