به‌رشلۆنه‌ دواین هه‌وڵ بۆ گواستنه‌وه‌ی لیڤاندۆفسكی ده‌دات

بۆتان عومه‌ر 20/06/2022 - 09:17 بڵاوکراوەتەوە لە وه‌رزش

راپۆرته‌ رۆژنامه‌وانیه‌كان له‌ ئیسپانیا ئاشكرایان كردووه‌ یانه‌ی به‌رشلۆنه‌ له‌ هه‌فته‌ی داهاتوو كۆبونه‌وه‌یه‌كی یه‌كلاكه‌ره‌وه‌ له‌گه‌ڵ بایرن میونخ ئه‌نجام ده‌دات بۆ یه‌كلایی كردنه‌وه‌ی گرێبه‌ستی رۆبه‌رت لیڤاندۆفسكی.
لیڤاندۆفسكی ته‌مه‌ن 34 ساڵه‌ داواكارییه‌كی پێشكه‌ش به‌ كارگێری بایرن میونخ كردووه‌ بۆ رۆیشتن له‌م هاوینه‌ له‌ یانه‌كه‌ سه‌ره‌رای ئه‌وه‌ی له‌هاوینی داهاتوو گرێبه‌سته‌كه‌ی كۆتایی دێت.
رۆژنامه‌ی سپۆرتی كاتالۆنی ئاشكرای كردووه‌ به‌رشلۆنه‌ گرێبه‌ستێكی به‌بری 32 ملیۆن یۆرۆ پێشكه‌ش به‌ بایرن میونخ كردووه‌ له‌گه‌ڵ پێنج ملیۆن یۆرۆ گۆرانكاری ، به‌ڵام بایرن میونخ بیری له‌ گرێبه‌سته‌كه‌ نه‌كردۆته‌وه‌و هیچ گفتوگۆیه‌كی ئه‌نجام نه‌داوه‌ چونكه‌ شوێن گره‌وه‌ی نیه‌.
بایرن میونخ ئاره‌زوو ده‌كات گرێبه‌ستی لیڤاندۆفسكی به‌ 50 ملیۆن یۆرۆ له‌گه‌ڵ به‌رشلۆنه‌ یه‌كلایی بكاته‌وه‌، ره‌نگه‌ به‌رشلۆنه‌ به‌و گرێبه‌سته‌ رازی بێت و 40 ملیۆن یۆرۆ پێشكه‌ش بكات و 10 ملیۆن یۆرۆش وه‌ك گۆرانكاری له‌ گرێبه‌سته‌كه‌ بمێنێت.