میلان بەمەبەستی وەرگرتنەوەی پێشەنگ دەبێتە میوانی بۆڵۆنیا

سامان زاهیر 23/10/2021 - 15:16 بڵاوکراوەتەوە لە وه‌رزش

لەسەر یاریگای ریناتۆ دال ئارا لەیارییەكانی جەولەی نۆیەمی خولی یانەكانی ئیتاڵیا یانەی میلان بەمەبەستی وەرگرتنەوەی پێشەنگی یانەكان دەبێتە میوانی بۆڵۆنیا.
میلان خاوەنی 22 خاڵەو پلەی دووەمی ریزبەندی گرتوەو بەجیاوازی تەنها دوو خاڵ لەدوای ناپۆلی پێشەنگ دێت، میلان لەم وەرزە حەفت بردنەوەو یەك بەرامبەر بوونی هەیە،میلان بە تۆمار كردنی 18 گۆڵ سێیەم بەهێزترین هێڵی هێرشبردنی لەخولەكە هەیەو حەفت گۆڵیشی لێ تۆمار كراوە دووەم بەهێزترین هێڵی بەرگری لەخولەكە هەیە.
لەكاتی بەدەست هێنانی بردنەوە لەم یارییەدا میلان پێشەنگی خولی یانەكانی ئیتاڵیا وەردەگرێتەوە بەشێوەیەكی كاتی،ئەنجامەكانی ئەم وەرزەی میلان لەخولی ناوەخۆ زۆر جیاوازی هەیە لەئەنجامەكانی ئەم یانەیە لەسەر ئاستی یانە پاڵەوانەكانی ئەوروپا، میلان لەم وەرزەی ئەوروپا لەسێ یاری لەدوای یەك توشی دۆران هاتووە.
بیۆلی راهێنەر بەر لەم یارییە هەواڵێكی خۆشی پێشگەیشت پاش ئەوەی ئەنتی ریبیچ لەیاری بەرامبەر هیلاس ڤیرۆنا بەهۆی پێكانەوە یاریگای بەجێهێشت ئێستا بەرەو چاك بوونەوە چووەو بۆ ئەم یارییە ئامادەیە، ئەمەش وادەكات كێشەی نەبوونی گۆڵكار لە تیپەكە چارسەر بكات بەتایبەتی زلاتان ئیبراهیمۆفیچیش بۆ یاری كردن ئامادەیە.
ئەوەی كێشەیە بۆ میلان هەریەك لە سیۆ هێرناندیز و ئیبراهیم دیاز بەهۆی توش بوونیان بە ڤایرۆسی كۆرۆنا بەشداری لەم یارییەش ناكەن چونكە تەواو چاك نەبونەتەوە.
راهێنەری میلان بیۆلی لەبارەی ئامادەیی تیپەكەی بۆ یارییەكە گوتی :" تیپەكەمان بەشێوەیەكی باش ئامادە كردووە، ئەركمان ئاسان نابێت، دەبێت كار بۆ ئەوە بكەین هەڵەكانی رابردوو چاك بكەینەوە، ئەو هەڵانەی لە یانە پاڵەوانەكان ئەنجامماندا نابێت دووبارە بكەینەوە، دەمانەوێت پێشەنگ وەربگرینەوە ئەوەش تەنها بە بردنەوە دەبێت.
هەرچی بۆڵۆنیایە خاوەنی 12 خاڵەو پلەی هەشتەمی ریزبەندی گرتوە،ئەنجامەكانی ئەم تیپە لەچاو وەرزی رابردوو باشترەو لەدواین یاریش لەگەڵ ئۆدنیزی بەرامبەر بووە،خاوەنی سێ بردنەوەو سێ بەرامبەرەو دوو دۆرانی هەیە،هێرشبەرانی 13 گۆڵیان تۆمار كردووەو 15 گۆڵی لێ تۆمار كراوە، بەرگرییەكی لاوازی هەیە، ئەمەش ئەركی بەرامبەر میلان زەحمەت دەكات.