هه‌ڵبژادرنی یانه‌كان چ هه‌ڵبژاردنێك

بۆتان عومه‌ر 23/10/2021 - 15:10 بڵاوکراوەتەوە لە وه‌رزش

هەڵبژاردنی یانەكان لە كوردستان دەستی پێكردووە، بەشێوەیەك شەقامی وەرزشی دڵخۆشنین بەم هەڵبژاردنە چونكە زۆربەی ئەوانەی پێشوو لە یانەكە ئەندام یان سەرۆك بوون خۆیان كاندید كردۆتەوە، بەشێكی زۆریشان رێگای جیاوازیان گرتۆتە بەر لە پێناو مانەویان.
هەندێكیشان تەواو لە لایەن حزبەكەیانەوە پشتگیری دەكرێت ، دەرفەت بە كەسانی تر نادەن لە بازنەی یانەكە نزیك ببنەوە ئەمەش تەواو وەرزشكارانی لە گۆرانكاریەكان بێ‌ هیوا كردووە.
پشكی شێر لەم دۆخەی ئێستا كە لە هەڵبژاردنی یانەكان دەگوزەرێت، هۆكاری بەرێوەبەرایەتی گشتی وەرزشە، چونكە ئەوان لەسەر یاسای وەرزشی هەڵبژاردنی عێراقی هەڵبژاردن دەكەن كە ئەم یاسایە زۆر كۆنە، هەروەها بەشێكیان لە یاساكە دەستكاری كردووە ، لەژێر ناونیشانی (بە پێی رێنماییەكان) ئەم گۆرانكاریە بە پێی رێنماییەكان تەواو بە پێستی ئەوانە دووراوە كە حزب پاڵپشتیان دەكات و هۆكاری خراپی و ناشیرینكردنی وەرزشی ئەم هەرێمەن.
ئەوەی جێگەی سەرنجە تاكو ئێستا سەرۆكی یانەیەكی گەورەی كوردستان نەبووە خۆی كاندید نەكربێتەوە یان دەرنەچووبێت، بە هۆكاری جیاوازیش كورسیەكانیان مسۆگەر كردووە، بگرە لە پێناو مانەوەی خۆشیان، هەموو هێزی خۆیان بۆ ناشیرین كردن و لە باربرنی هێزی ركابەرەكەیان خەرج كردووە، تەنها چەند یانەیەكی كەم نەبێت ئامادەبوونە تەواوی ئەندامان بە سەرۆكیشەوە دەست لەكاربكێشنەوە ئەمانەش بە پەنجەی دەستێك دەژمێردرێن
دەرچوونی سەرۆك و ئەندامانی پێشووی یانەكان گۆرانكاری لە جەوهەری وەرزشی ئەم هەرێمە ناكات و بگرە لە چەق بەستویی دەیهێلێتەوە، چونكە ئەوان ئێكسپاریەر بوون و بیرۆكەو پرۆژەیان بۆ پێشخستن و نیشتمانكردنی وەرزش نیە.