چاکسازی بەقسە وخۆزگە و روکەش ناکرێت

25/01/2021 - 09:26 بڵاوکراوەتەوە لە وتار

د.ئه‌مجه‌د مه‌حمه‌د


سیستەمی حوكمرانی لە هەرێمی كوردستان پێویستی بە چاكسازی بنەرەتی هەیەو دەبێت لە دەزگا هەرە باڵاكانەوە دەست پێبكات.

سەبارەت بە ئەگەری بوونی ئیرادەی چاكسازی لەلایەن هەردوو حزبی دەسەڵاتداری یەكێتی و پارتیەوە لە نێو ئەم كابینەیەی حكومەتدا، لە كاتێكدا ئەم حكومەتە بەدەیان ئاریشەو قەیراندا گوزەر دەكات.

بە بۆچوونی من هیچ حزبێك ناتوانێت بڵێت من چاكسازیم ناوێت، هەموو حزبەكان بە ئۆپوزسیۆنی پێشوشەوە هەمویان بانگەشەی چاكسازی دەكەن و بەرنامەشیان هەیە بۆ ئەو مەبەستە، ئەوەی دەكەوێتە بەرچاوو ئاشكرایە كە پارتی و یەكێتی لەم كاتەدا زیاتر لەجاران پێویستیان بە چاكسازی هەیەو دەگونجێت هەنگاوی زیاتریشی بۆ بنێن بەهۆی ئەوەی ئۆپوزسیۆنی پێشتر ئیستا لەگەڵیاندان و تاكو رادەیەك ئاگادارن بە گرفتەكان ئەوانیش واتە پارتی و یەكێتی نایانەوێت كەموكورتیەكانیان بخرێتەروو، بەڵام گرفتەكە لەوەدایە چاكسازی بە دروشم و نیەت و ویستن و هەوڵی بچووك و سەرەتایی و رووكەش ئەنجام نادرێت، سیستەمی حوكمرانی لە هەرێمی كوردستان پێویستی بە چاكسازی بنەرەتی هەیەو دەبێت لە دەزگا هەرە باڵاكانەوە دەست پێبكات و دواتر دەزگاكانی تر بە ئاسانی چاكسازی تێدا دەكرێت، ئەوەی پاساوی بەردەوامی دواخستنی چاكسازیە باهەمواری بارودۆخ و مەترسی دوژمنی دەرەكی كە ئیستە هیچ كەس ناتوانێت نكۆڵی لەو مەترسیە بكات، بەڵام بەردەوام ئەوەش دووپات كراوەتەوە كە یەكریزی و چاكسازی ناوخۆیی و یەكدەنگی، هێزو گەورەیی گەلی كورد زیاتر دەكات و لەبەرامبەر ئەو دوژمنە دەرەكیە زامنی سەركەوتن دەبێت، بەڵام بەداخەوە بەردەوام گرفتەكانی ناوخۆ دواخراوەو یەكریزی هەمیشە لە مەترسیدایەو لاوازبوونیش بەرەنجامی حەتمیە لەبەرامبەر كۆسپەكان، دەبینین لێرەو لەوێ هاودەنگی كورد لەسەر ڕووداوەكان لەسەر ئاستی نەتەوەیی لە ئاستێكی نزمدایەو بۆ روبەروبونەوەی دوژمنیش موزایەدەی حزبی و شكاندنی یەكتری زیانی زۆری گەیاندوە، كەواتە دەتوانین بڵێین لە هەموو كات زیاتر بارودۆخ لە بارنیەو كەمی بودجەو داهات و شەری داعش، ئەركی هەموو حزبەكانی گرانكردوە هەریەكەیان بەپێی سەنگ و قەبارەو بەرپرسیاریەتی خۆیان.

وە لەوەڵامی ئەوەی كە ئایا ئەم حاڵەتە بۆ ئەو لایەنانەی كەپێشتر ئۆپۆسزیۆن بوون و ئێستا بەشداری حكومەتن تاقیكردنەوەیەكی قورس نیە، وە چۆن دەتوانن بە سەلامەتی لێی دەرچن، ئەو مامۆستایەی زانكۆ زیاتر ووتی، حزبەكانی ئۆپۆزسیۆنی پێشوش لەبەردەم قەیرانێكی گەورەدان و لە نێوان وەعدو بەڵێنە زۆرەكانی چاكسازی و بارودۆخی ناهەمواری هەرێمدا هاسەنگیەكی قورس و گرانیان بۆ دەكرێت، لەبەر ئەوە گەر بكشێنەوە لە حكومەت بە پاساوی بوارنەبوون بۆ چاكسازی ئەوا تووشی بەرپرسیاریەتێكی میژوویی دەبن كە نەیانتوانی بەرگەی كۆسپ و نارەحەتیەكانی میللەت بگرن، لەو لاشەوە گەر بێدەنگ بن و فشار بۆ حزبەكانی دەسەڵات دروست نەكەن ئەوا میللەت بەگشتی و دەنگدەرانیان بە تایبەتی دەیانخەنە ژێر پرسیارو پێیان دەڵێن هیچتان بۆ نەكراو نەتانتوانی دروشمەكانتان بكەنە واقیع و بیهیوا دەبن لێیان.

لەبەرامبەر ئەو حاڵەتەدا بە بۆچوونی من باشتر وایە كە هەموو حزبەكان بە دەسەڵات و ئۆپۆزسیۆنەوە راستگۆیانە لە گەل و خەڵك و میللەتی خۆیاندا بدوێن و شەفافانە راستیەكان بخەنە ڕوو وە حزبایەتی و بەرژەوەندی تەسكی حزبی و كەسی وەلا بنێن و ئەوەی پێیان دەكرێت لە چاكسازی و ڕووبەروبونەوەی گەندەڵی ئەنجامی بدەن و ئەوەش كە لە توانادا نیەو بارودۆخ رێی پێنادات ئەوا میللەتی لێ ئاگاداربكەنەوەو خەڵكیش ئەوەندە وشیاری هەیە كە خۆڕاگرانە ڕووبەروی نارەحەتیەكان ببێتەوە، بەڵام ئاشكرایە میللەت شتێكی موستەحیل و قورسی ناوێت، ئیستە چی رێی لەوە گرتووە كە چارەسەری بن دیوارو خاوەن دوو موچە بكرێت لەگەڵا چەندین هەنگاوی تر كە خەرجی حكومەت كەمدەكاتەوەو ورەو هیوا دەبەخشێتەوە بە خەڵك.

ئێستە بۆ هێزی پێشمەرگە یەك ناگرێتەوە ؟ بۆ پاڵاوگەی زیاتر ناخرێتە كارو چارەسەری كێشەی سوتەمەنی بكرێت، بۆ هەتاكو میللەت نەیەتە سەرشەقام و فشار دروست نەكات موچە دابەش ناكرێت ؟ بۆچی حزبەكان خێرا رێك ناكەون بۆ دروستكردنی حكومەتی خۆجێیی پارێزگاكان و ئەوەندە كۆبوونەوەو پرۆژەیان ئاڵوگۆر كرد میللەت تاقەتی نەما ؟ بۆچی كێشەكان لە گەڵا بەغدا حەل ناكەن و رێككەوتنەكان ناخەنە بواری جێبەجێكردن ؟ چەندین بۆچی تر ... بە هیوای هەنگاوی بەپەلەو چاكسازی فیعلی، بە پێچەوانەوە خەڵك بەرگە ناگرێت و فشار بۆ سەر حزبەكان دروست دەكات و مەترسی هەڵوەشانەوەی حكومەتی بنكە فراوان لە ئارادایە.