دیجیتاڵ میدیای سپێده‌

ئەنجومەنی باڵای مامۆستایانی یەكگرتوو له‌ ڕاگه‌یه‌ندراوێكدا ڕایده‌گه‌یه‌نن: ئێمە لە مامۆستایانی یەكگرتوو، داوا لە سەرجەم مامۆستایان بە گشتی و، كۆمەڵگای پەروەردەكراو و ڕەوشت بەرزی كوردستانمان دەكەین، كە نابێ ڕێگا بدەن وەها هەوڵێك سەربگرێت و، پرۆگرامی قوتابیانمان لە قۆناغەكانی خوێندندا بێبەش بكرێت لە پەروەردەی ئیسلامی و بەها جوانەكانی ئیسلام.
ده‌قی ڕاگه‌یه‌ندراوه‌كه‌:

(بەناوی خوای بەخشندەی میهرەبان)
بەڕێزان/ مامۆستایانی پەیامداری كوردستان..
باوك و دایكانی خۆشەویست..
پەرلەمانتارانی دڵسۆزی كوردستان..
دڵسۆزانی پەروەردەو فێركردن..
(سڵاوی خوای گەورەتان لێبێ)
وەك هەموولایەك ئاگادارن كە ماوەی چەندین ساڵە حكومەتی هەرێمی كوردستان بە شێواز و هەنگاوی جیاجیا كار لەسەر بێ ئەرزشكردنی خوێندن و لاوازكردنی پەروەردە دەكات و، خەریكە نەوەیەك پێدەگات كە لاوازە لە زۆر بەهای پەروەردەیی و، ئاكار و رەوشتی جوانی مرۆڤایەتی، لە نوێترین هەنگاویشدا حكومەت پرۆژەیاسای وەزارەتی پەروەردەی ئامادەكردووە بۆ پەرلەمانی كوردستان، كە تیایدا بەڕوونی گۆڕانكاری كردووە لە وانەی (پەروەردەی ئیسلامی)و، وەك وانەیەكی لاوەكی ئاماژەی پێداوە، لەگەڵ گۆڕانكاری لە ناوەكەی بۆ ( پەروەردەی ئایینی)، هەروەها رێخۆشكردنی كردووە بۆ گۆڕانكاری لە پرۆگرامی وانەكەدا، كە دیار نییە بە چ ئاراستەیەكیدا دەبات، ئەمەش هەنگاوێكی مەترسیداری دوور مەودایە بۆ خاڵی كردنەوەی كۆمەڵگا لەو بەهاو ڕەوشتە جوان و بەرزانەی كە چەندین نەوەیە تاكەكانی كۆمەڵگاكەمان لە پەیامی پیرۆزی ئیسلامەوە وەریانگرتووە، بەڵام ئیدی ئەیانەوێ نەوەكانی داهاتوو لەو پەیامە جوانانە دووربكەونەوە، وەك دەبینین چۆن پەنا بۆ كوشتنی كەسایەتییەكان و، سەرخۆشكردن بە مادەهۆشبەرەكان و نەریتە نەخوازراوەكانی تر دەبەن..

ئێمە لە مامۆستایانی یەكگرتوو، وێڕای دژایەتی تەواومان بۆ ئەو هەوڵ و ڕێگا هەڵەیەی حكومەتی هەرێم و وەزارەتی پەروەردە، داوا لە سەرجەم مامۆستایان بە گشتی و، كۆمەڵگای پەروەردەكراو و ڕەوشت بەرزی كوردستانمان دەكەین، كە نابێ ڕێگا بدەن وەها هەوڵێك سەربگرێت و، پرۆگرامی قوتابیانمان لە قۆناغەكانی خوێندندا بێبەش بكرێت لە پەروەردەی ئیسلامی و بەها جوانەكانی ئیسلام..

هەروەك ڕێز لە سەرجەم ئایینەكانی تر ئەگرین و وەك لە ڕابردوودا گوزەری كردووە، پێویستە ئایینی خۆیان لەگەڵ پرۆگرامەكانی خۆیاندا بخوێنن و، فشار لەسەر هیچ لایەك دروست نەكرێت بۆ خوێندن و پەروەدەی ئایینەكانی تر، ئەمەش ئەو پەیامە پەروەردەییەیە كە كەسایەتییە گەورەكان و تاكەكانی پڕ لە بەهاجوانەكانی كۆمەڵگەكەمانی لەسەر پەروەردە كراوە..

هیوادارین پەرلەمانی كوردستان بەرپرسیارانە تر لەبەردەم تاكەكانی كۆمەڵگادا بێتە جواب و دەنگ بە وەها پرۆژەیەك نەدات، هەروەها وەزارەتی پەروەردەش پێداچوونەوە بكات و پرۆژەكەی بگەڕێنێتەوە بۆ هەموواركردنەوەی ئەو بڕگەو بابەتانەی جێگای سەرنج و مشتومڕی گەورەن لای دڵسۆزان..
سەركەوتوو بێت ئیرادەی پەروەردەو فێركردنی دروست و، پاراستنی كۆمەڵگاكەمان لە بەهاو نەریتە نەخوازراوەكان..
ئەنجومەنی باڵای مامۆستایانی یەكگرتوو
٢٨/٦/٢٠٢٢