سەرۆکوەزیرانی ئیسپانیا، پێدرۆ سانچێز ئاماژەی بەوە کرد لە پاش ئەو دانیشتنەی هەفتەی داهاتوو لە نەتەوە یەکگرتووەکان ساز دەکرێت سەبارەت بە ناساندنی فەڵەستین وەک ئەندامی تەواو، هەنگاو دەنێن لە بارەی داننان بە دەوڵەتی فەڵەستیندا.
ڕێبەری هاوپەیمانی دیموکرات و پارتی سۆسیال دیموکراتی پرتوگال، لویس مۆنتیگرۆ کە دوای هەڵبژاردنە پێشوەختەکەی 10ـی ئاداری وڵاتەکەی حکوومەتێکی ڕاستڕەوی کەمینەی پێکهێنا، وەک سەرۆکوەزیران یەکەم سەردانی فەڕمی بۆ ئیسپانیا ئەنجام دا.
دوای کۆبوونەوەیان سانچێزی چەپڕەو و مۆنتیگرۆ-ی ڕاستڕەو کۆنگرەیەکی ڕۆژنامەوانییان ئەنجام دا و، جەختیان لەسەر ئەوە کردەوە کە سەرەڕای جیاوازیە ئایدۆلۆجییەکان ئیسپانیا و پرتوگال بەیەکەوە کار دەکەن لە پێناو بەرژەوەندیە هاوبەشەکان.
لە کاتێکدا هەردوو سەرکردە هاوڕابوون لە بارەی پشتیوانی کردنی ئۆکراینا کە لەژێر داگیرکاری ڕووسیادایە، بۆچوونیان جیاوازە سەبارەت بە غەززە و فەڵەستین کە ئیسرائیل بەردەوامە لە هێرشکردنە سەری.
لای خۆیەوە، سەرۆکوەزیرانی ئیسپانیا سانچێز ڕایگەیاند: "داننان بە دەوڵەتی فەڵەستیندا پێویستییە. چاوەڕوانی هەفتەی داهاتووین و لە پاش ئەو دەنگدانەی لە نەتەوە یەکگرتووەکان ئەنجام دەدرێت، هەنگاو دەنێین".
سانچێز ئاماژەی بەوە کرد کە حکوومەتی ئیسپانیا هەر لە سەرەتاوە هەڵوێستی لە بارەی ڕۆژهەڵاتی ناوەڕاست ڕوون و ئاشکرایە و، بەرگریی لە ئاشتیی، دیپلۆماسیی و یاسای نێودەوڵەتیی دەکەن.
لای خۆیەوە، سەرۆکوەزیرانی پرتوگال، لویس مۆنتینیگرۆ ئاماژەی بەوە کرد کە حکوومەتی وڵاتەکەی داوای ئاگربەستی بەپەلە دەکات و، پێویستە ئەوەیش خزمەت بە بەدیهێنانی ئاشتیی و دەستەبەرکردنی هاوکاری مرۆیی بکات، پاشان پێویست بە نەخشەڕێگایەک دەبێت کە پێویستە کۆمەڵگەی نێودەوڵەتی بەیەکەوە ئەنجامی بدەن.
گوتیشی: "حکوومەتی پرتوگاڵ پشتیوانی لە ئەندامێتی تەواوی فەڵەستین دەکات لە نەتەوە یەکگرتووەکان، بەڵام وەک هەندێک وڵاتی دیکە بەرەو پێشتر ناچین لە داننان بە دەوڵەتی فەڵەستیندا".
